Монголын говийн уудам нутагт хэрэгжиж буй “MARS-V” төсөл дэлхийн томоохон хэвлэлүүдийн анхаарлыг татаж байна. CNN, Kursiv Media зэрэг олон улсын эх сурвалжууд уг санаачилгыг “сарын турш үргэлжлэх бодит Марс туршилт” хэмээн нэрлэж, шинжлэх ухаан ба аялал жуулчлалыг хослуулсан шинэлэг туршилт хэмээн онцолжээ.
CNN: Монголын говьд “Марс” мэт туршлага
CNN-ийн нийтлэлд дурдсанаар оролцогчид говийн -30 хэмийн хүйтэнд, суурин газраас хол тусгаарлагдсан орчинд “сансрын нисэгчийн амьдралыг” туршина. Өглөө бүр тэд хөлдөөж хатаасан монгол хоолоор өглөөний цайгаа ууж, “сансрын хантааз”-аа өмсөөд багийн хамт элсэн шуурга руу даалгавраа биелүүлэхээр гарна.
Энэ бол жуулчдад зориулсан зугаа биш, харин Марс гараг дээр амьдрах бэлтгэлийн бодит туршилт юм. “MARS-V”-ийн гүйцэтгэх захирал Д.Энхтүвшин хэлэхдээ: “Манай зорилго бол хүмүүсийг бүрэн тусгаарлагдсан орчинд өөрийн биеэр туршлагажуулах. Хэрэв протокол зөрчвөл үхэлд хүрнэ гэж төсөөлөх ёстой” хэмээн онцолжээ.
Төслийн зорилго ба ач холбогдол
“MARS-V” нь Монголын нийслэлд төвтэй төрийн бус байгууллагын санаачилга бөгөөд хүн төрөлхтний Ангараг гараг руу хийх аяллын сургалт, туршилтын бааз байгуулах зорилготой. Судлаачдын үзэж байгаагаар Монголын говь нь дэлхий дээрх Марстай хамгийн төстэй орон — улаан хөрстэй, хуурай, -40°C-аас +45°C хүртэл хэлбэлздэг уур амьсгалтай бүс юм.
Энэхүү нөхцөл нь зөвхөн судалгааны туршилтад төдийгүй аялал жуулчлалын шинэ төрөл бий болгоход ч нэн тохиромжтой гэж үзэж байна. Байгаль, технологи, монгол уламжлалыг хослуулсан энэхүү төсөл 2029 онд анхны жуулчдаа хүлээн авах төлөвтэй.
Өдөр тутмын сорил ба сургалтын орчин
“MARS-V”-ийн оролцогчид геологийн шинжилгээ хийх, хөрсний дээж цуглуулах, хиймэл холбоогоор командын төвтэй харилцах гэх мэт бодит даалгаврууд гүйцэтгэнэ. Гаднын тусламжийг нууцлан, оролцогчид бие даан амьд үлдэх чадвараа сорих юм.
Хоол хүнсний хувьд “сансрын хүнс” маягийн хөлдөөж хатаасан монгол хоол хэрэглэнэ. Харин орон сууц нь монгол гэрийн загвартай, бөмбөгөр хэлбэрийн модуль сууц байх ба энэ нь үндэсний өв соёлыг орчин үеийн технологитой хослуулсан бүтээл юм.
Kursiv Media: “MARS-V” — 2029 онд нээгдэх зоримог төсөл
Kursiv Media мэдээлснээр, “MARS-V” төслийн хүрээнд Монголын говьд 2029 он гэхэд дэлхийн хамгийн бодит Марс амьдралын симуляцийн төв байгуулагдана. Энэ нь зөвхөн жуулчны бус, харин сэтгэлзүй, бие бялдрын нарийн шалгуур бүхий шинжлэх ухааны туршилт байх юм.
Оролцогчдыг сонгох үйл явц гурван үе шаттай:
- Сэтгэлзүй, биеийн бэлтгэлийн нарийн шалгалт
- 3 сарын цахим сургалт
- 1 сарын бодит туршилт говьд тусгаарлагдан амьдрах
Оролцогчид гар утсаа хураалган, холбоо, авто замаас хол орчинд, -30°C хүйтэнд туршилтаа явуулах юм. Баазын загвар нь монгол гэрийн уламжлалт хэлбэрийг орчин үеийн архитектуртай хослуулсан шийдэлтэй байна.
Үнэхээр сонирхолтой санаа байна, ийм төсөл Монголд хэрэгжиж байгаа нь бахархалтай
Ангараг гаригийн амьдралыг ингэж дуурайлган хийх нь үнэхээр шинэ үеийн ажил юм