Энэ бямба гарагт “Автомашингүй өдөр-2025” арга хэмжээ “Эрсдэлгүй – эрүүл орчныг хамтдаа” уриан дор зохион байгуулагдана.
Судалгаа, хэмжилт
НЭМГ болон нийслэлийн Агаар, орчны бохирдолтой тэмцэх газар хамтран автомашины хөдөлгөөнийг хязгаарласан бүсүүдэд агаарын чанарыг хэмжих бөгөөд Нийгмийн эрүүл мэндийн үндэсний төв дуу чимээний түвшинг тодорхойлж, харьцуулсан судалгаа хийхээр төлөвлөжээ.
Хотын агаар, хөдөлгөөний нөхцөл
Улаанбаатар хотод бүртгэлтэй 750 мянган тээврийн хэрэгслийн 600 мянга орчим нь өдөр бүр замын хөдөлгөөнд оролцдог гэсэн тооцоо бий. Нэг км² нутаг дэвсгэрт дунджаар 1900 гаруй машин оногдож байгаа нь дэлхийн өндөр нягтшилтай хотуудын түвшинд хүрсэн үзүүлэлт юм. Автомашинаас ялгарах нүүрстөрөгчийн дутуу исэл, хүхрийн давхар исэл, азотын ислийн нэгдэл, нарийн ширхэгтэй тоосонцор зэрэг нь хүний эрүүл мэндэд сөрөг нөлөө үзүүлдэг бөгөөд нэмэлтээр чимээ шуугианы бохирдол бий болдог.
Хязгаарлалт, зохицуулалт
Автомашингүй бүсэд зөвхөн автомашин төдийгүй цахилгаан скүтер, мопед, цахилгаан мотоцикл (суррон) нэвтрүүлэхийг хориглосон. Автомашингүй бүсчлэлээс гаднах гудамж, замд автомашины дугаарын хязгаарлалт хэвийн үргэлжилнэ. Цагдаагийн байгууллага хөдөлгөөний аюулгүй байдлыг хангах зорилгоор хяналт шалгалт хийхээр төлөвлөсөн.
Нийтийн тээврийн өөрчлөлт
Өдөрлөгийн үеэр нийтийн тээврийн 43 чиглэлийн 453 тээврийн хэрэгслийн маршрутад өөрчлөлт орох бөгөөд иргэдийг урьдчилан мэдээлэлтэй байхыг сануулсан.
