Увс аймгийн Малчин сумын нэгдүгээр багийн “Хар тэрмэс” хэмээх газарт, Хяргас нуурын усанд живж байсан хүүхдийг аварсан тухай дуудлага 2025 оны долдугаар сарын 28-ны орой 22:30 цагт бүртгэгджээ.
Улаанбаатар хотоос гэр бүлийн хамт Увс аймгийн Хяргас нуурт аялж байсан 15 настай охин нуурын эргээс 100 метр орчим зайд хийлдэг гудаснаас унаж, живэх аюулд орсон байна. Энэ үед нуурын эрэг орчмоор Усны ослоос урьдчилан сэргийлэх эргүүлийн үүрэг гүйцэтгэж байсан Онцгой байдлын газрын Эрэн хайх, аврах салбарын алба хаагчид охиныг амжилттай аварчээ.
Онцгой байдлын ерөнхий газар (ОБЕГ)-аас анхааруулж буйгаар, аялал зугаалгаар явахдаа иргэд зориулалтын бус, стандартын шаардлага хангаагүй хийлдэг гудас зэрэг хөвөгч хэрэгсэл ашиглан гол, нуурын усанд орох нь эрсдэлтэй тул болгоомжтой байхыг уриаллаа.
