Пакистаны засгийн газар 5-р сарын 12-нд “Буньян-ун-Марсус” нэртэй цэргийн ажиллагаагаа дуусгавар болгосон тухайгаа мэдэгдлээ. Энэ ажиллагаа нь Энэтхэгийн зүгээс ирсэн довтолгоонд хариу барих зорилготой байв.
Албан ёсны мэдэгдэл
Тус улсын Зэвсэгт хүчний хэвлэлийн албанаас Geo TV сувагт өгсөн мэдээлэлд:
“Пакистан Энэтхэгийн хэд хэдэн цэргийн байгууламж руу хариу цохилт өгсөн бөгөөд энэ нь Буньян-ун-Марсус нэртэй цэргийн эсрэг давшилтын нэг хэсэг байлаа. Одоо энэхүү ажиллагааг албан ёсоор зогсоож байна” хэмээн онцолсон байна.
Мөн ISPR (Олон нийтийн мэдээллийн алба)-аас мэдээлснээр, 5-р сарын 6 болон 10-нд хийгдсэн довтолгоонууд нь дээрх ажиллагааны хүрээнд хийгдсэн бөгөөд үүний зэрэгцээ баруун бүсэд хамгийн өндөр үр дүнтэй терроризмын эсрэг ажиллагааг ч давхар явуулжээ.
Мөргөлдөөний шалтгаан ба хариу арга хэмжээ
Пакистан, Энэтхэг хоёрын хоорондын хурцадмал байдал нь 4-р сарын 22-нд Жамму ба Кашмирт болсон террорист халдлагаас үүдэлтэй. Тус халдлагын улмаас 27 хүн амиа алдсан бөгөөд энэ нь хоёр улсын харилцааг эрс дордуулсан.
Энэтхэгийн Батлан хамгаалах яам 5-р сарын 7-нд “Синдур” нэртэй цэргийн ажиллагааг эхлүүлж буйгаа зарласан бол Пакистан хариуд нь Энэтхэгийн нутаг дэвсгэр рүү пуужингийн цохилт өгсөн талаар нутгийн хэвлэлүүд мэдээлж байв.
Гал зогсоох хэлэлцээр ба АНУ-ын оролцоо
Талууд 5-р сарын 10-нд гал зогсоох хэлэлцээрт хүрсэн ба үүнд АНУ-ын зуучлал нөлөөлсөн талаар АНУ-ын Ерөнхийлөгч Дональд Трамп мэдэгдсэн байна.
