Оросын хоккейн түүхэн дэх хамгийн нэр хүндтэй тоглогчдын нэг Александр Овечкин энэ улирлыг тоглоод мэргэжлийн замналаа өндөрлүүлэхээр шийдсэнээ мэдэгдлээ. 41 настай довтлогчийн хувьд энэ нь “Вашингтон Кэпиталз”-ийн өмсгөлтэй өнгөрүүлэх сүүлчийн улирал болох юм.
Овечкин зодог тайлах шийдвэрээ улирал эхлэхээс өмнө зарлахаар гэр бүлийнхэнтэйгээ ярилцаж тохирсон гэдгээ хэвлэлийн бага хурлын үеэр хэлжээ. Тэрбээр эхлээд гэр бүлдээ, дараа нь багийнхандаа энэ тухай мэдэгдсэн байна.
“Би 20 настай залуу биш”
Зодог тайлах болсон шалтгааныхаа талаар Овечкин нас, биеийн байдал болон гэр бүлдээ илүү их цаг гаргах хүсэл нь гол нөлөө үзүүлсэн гэдгийг онцолжээ.
Тэрбээр: “Эхнэртэйгээ удаан ярилцсан. Мөн бие хаагаа сонсох ёстой. Би 20 настай залуу биш. Би хүүхдүүдтэйгээ тоглохыг хүсэж байна. Том болохоор нь хамтдаа хоккей, хөлбөмбөг, сагсан бөмбөг тогломоор байна. Энэ бүхнийг хийхэд эрүүл мэнд шаардлагатай” хэмээн ярьсан байна.
Одоогийн биеийн байдлын талаар асуухад “Бүх юм зүгээр” гэж товч хариулжээ.
Зочлон тоглох бүр нь үдэлтийн тоглолт болж магадгүй
Сүүлийн улирал нь эхэлж буй учир Овечкины зочлон тоглох тоглолт бүр тухайн хот дахь эцсийн тоглолт нь болж мэднэ. Тиймээс бусад багууд түүнд зориулан үдэлтийн ёслол хийх эсэх талаар асуухад тэрбээр үүнд нэг их ач холбогдол өгөхгүй гэдгээ илэрхийлсэн байна.
“Би багаа ялуулахын тулд тоглолтдоо л анхаарна. Бусад багууд ямар нэг ёслол яагаад хийж болохгүй гэж? Хүссэнээ л хийж болно. Би харин үүнд анхаарлаа хандуулахгүй” гэжээ.
Стэнлийн цомыг Вашингтонд авчирсан нь карьерынх нь оргил үе
Аравдугаар сарын 5 нь Овечкины НХЛ-д анхны тоглолтоо хийснээс хойш 21 жил өнгөрсөн өдөртэй давхацжээ. Өнгөрсөн хугацааг эргэн дурсахдаа тэрбээр замналдаа өгсөлт, уналт аль аль нь байсан ч хамгийн том зорилгоо биелүүлсэн гэдгээ хэлсэн байна.
“Бидний гол зорилго Стэнлийн цомыг Вашингтонд авчрах байсан. Бид чадсан.” Овечкин “Вашингтон Кэпиталз”-тай урт хугацааны замнал туулж, багийнхаа түүхэнд онцгой байр суурь эзэлсэн тоглогчдын нэг болсон юм.
Түүнийг шинэ тоглогчдод багт дасан зохицоход нь тусалдаг байсан талаар асуухад Овечкин өөрөө ч мөн ахмад тоглогчдоос суралцаж өссөнөө дурсжээ.
Тэрбээр Оли Колциг, Жефф Халперн, Крис Кларк, Дайнюс Зубрус нараас олон зүйл сурсан бөгөөд тэр бүхнээ дараагийн үеийн тоглогчдод дамжуулахыг хичээсэн гэж ярьсан байна.
“Зүгээр л сайн тоглож, аль болох их таашаал авахыг хүсэж байна”
Сүүлийн улирлаасаа юу хүсэж байгааг нь асуухад Овечкин амжилтын тоо баримтаас илүү тоглолтоосоо таашаал авахыг хүсэж байгаагаа хэлжээ.
“Зүгээр л сайн тоглож, аль болох их таашаал авах” нь түүний энэ улирлын гол зорилго аж.
Харин карьерынхаа дараа “Вашингтон”-той ямар нэг байдлаар холбоотой үлдэх эсэхээ одоогоор шийдээгүй байна. Тэрбээр багт олон дотны найзтай, цаашдын асуудлыг дараа нь шийднэ гэдгээ хэлжээ.
Хөгжөөн дэмжигчдэдээ талархлаа
Овечкин хоккейгоос хамгийн ихээр багийн уур амьсгал, хамт олон болон тоглолтын мэдрэмжийг санана гэдгээ онцолсон байна.
Харин хөгжөөн дэмжигчдэдээ хандан: “Үргэлж дэмжиж байсанд баярлалаа. Та нар надад хайртай, би та нарт хайртай” хэмээн талархлаа илэрхийлжээ.
Ийнхүү НХЛ-ийн түүхэнд өөрийн нэрийг олон дээд амжилтаар үлдээсэн Александр Овечкин мэргэжлийн хоккейн замналынхаа сүүлчийн улирлыг эхлүүлэхэд бэлэн болж байна.
