Монгол Улсад албан ёсны айлчлал хийж буй БНСУ-ын Үндэсний Ассамблейн дарга У Вон Сик 2025 оны 4 дүгээр сарын 29-ний өдөр Улаанбаатар хотод байрлах доктор Ли Тэ Жүний дурсгалын цэцэрлэгт хүрээлэн болон Чойжин ламын сүм музейд зочиллоо.
Монголын ард түмэнд зориулсан эмчийн гавьяаг хүндэтгэлээ
У Вон Сик тэргүүтэй төлөөлөгчид доктор Ли Тэ Жүний дурсгалд цэцэг өргөж, түүний Монголын ард түмний төлөө хийсэн эмнэлгийн үйлс, амь биеэ зориулсан зүтгэлийг хүндэтгэн, түүхэн баримтат кино үзэж, дурсгалын танхимын барилгын явцтай танилцав.
Ли Тэ Жүн нь 1914 онд Богд хаант Монгол улсын нийслэл Хүрээнд ажиллаж, тухайн үеийн тархмал халдварт өвчнүүдийг эмчлэх үйлсэд оролцож байжээ. Түүний үнэнч сэтгэл, мэргэжлийн хандлагыг өндрөөр үнэлж VIII Богд хаан Жавзандамба түүнд “Эрдэнийн Очир” одон, Тушмэл цол олгосон юм. Доктор Ли Тэ Жүн Богд хааны дэргэд 38 нас хүртлээ ажилласан байна.
2001 онд Монгол, БНСУ-ын Засгийн газар хамтран Улаанбаатар хотод түүний нэрэмжит дурсгалын цэцэрлэгт хүрээлэн байгуулж, 2009 онд БНСУ-ын Үндэсний эх орончид, ахмад дайчдын агентлагийн дэмжлэгтэйгээр дурсгалын музейг нээлээ.
Чойжин ламын сүм музейд хүндэтгэл үзүүлэв
У Вон Сик тэргүүтэй төлөөлөгчид мөн Чойжин ламын сүм музей болон тус сүмийн Махранз, Гол, Занхан, Зуугийн, Ядам зэрэг гол сүмүүдэд зочилж, Монголын буддын шашин, соёлын өвийг тольдон үзэв.
Музейн захирал Д.Отгонсүрэн тэднийг угтан авч, 110 жилийн түүхтэй тус сүмийн шашин, соёл, түүхийн онцлог, мөн 6000 гаруй үзмэрийн 77 нь “Монголын түүх, соёлын хосгүй үнэт дурсгалт зүйл”-д багтсан болохыг танилцуулсан юм.
Харилцааг шинэ шатанд гаргах түүхэн айлчлал
БНСУ-ын Үндэсний Ассамблейн даргын энэ удаагийн айлчлал сүүлийн 12 жилийн хугацаанд анх удаа болж байгаагаараа онцлог. Айлчлалын хүрээнд хоёр орны Стратегийн түншлэлийг бэхжүүлэх, өндөр түвшний харилцан ойлголцол, парламентын хамтын ажиллагааг өргөжүүлэх, харилцан айлчлалын давтамжийг хадгалах зэрэг олон талт зорилтуудыг хэрэгжүүлж байна.
