Засгийн газрын хуралдаанаар эм, эмнэлгийн хэрэгслийг нэг эх үүсвэрээс буюу нэгдсэн журмаар худалдан авах шинэ журмыг баталлаа. Ингэснээр олон улсын стандарттай, ДЭМБ-ын хатуу зохицуулалттай улс орнууд болон НҮБ-ын Хүүхдийн сангаас (ЮНИСЕФ) чанартай эмийг боломжийн үнээр, шууд эх үүсвэрээс нь системтэйгээр худалдан авах боломж бүрдэж байна.
Шинэ журмын онцлог ба ач холбогдол
Нэгдсэн худалдан авалтын системд шилжсэнээр эрүүл мэндийн салбарт дараах томоохон давуу талууд бий болно:
- Эмийн тасалдлыг зогсоох: Иргэдийн тогтмол хэрэглэдэг даралт, өвчин намдаах, сахарын эм болон цөөн тоогоор захиалдаг тул нийлүүлэлт нь тасалддаг уналт, таталтын эмийг олон улсаас шууд их хэмжээгээр татан авна.
- Чанарын баталгаа: ДЭМБ-ын хатуу жагсаалттай улс орнуудаас албан ёсоор худалдан авалт хийх тул баталгаагүй, чанаргүй эмээс татгалзах нөхцөл бүрдэнэ.
- Төсвийн хэмнэлт: ЮНИСЕФ болон үйлдвэрлэгчдээс шууд авснаар дундын зуучлалын өндөр өртгийг бууруулж, улсын төсвийг мэдэгдэхүйц хэмнэнэ.
“Бид цусны бүлэгнэлтийн эмийг АНУ-ын компаниас нэгдсэн байдлаар худалдан авахад л 350 орчим сая төгрөг хэмнэсэн. Нэг эх үүсвэрийн худалдан авалттай болсноор улсын төсвийг хэмнэхээс гадна иргэд чанартай, албан ёсны эхийг боломжийн үнээр авах олон улсын жишигт нэгдэж байна.” — Эрүүл мэндийн сайд Э.Батшугар
