Шүүхэд захидал харилцааг нотлох баримтаар танилцуулсан байна
21 настай рэппер d4vd буюу Дэвид Энтони Бёркийг 13 настай Селеста Ривасын амийг хөнөөсөн хэрэгт буруутгаж буй хэрэгт шинэ мэдээлэл гарчээ. BBC-ийн мэдээлснээр, Селеста Ривас жирэмсэн байсан бөгөөд үр хөндүүлсэн гэх баримтуудыг Лос-Анжелесийн шүүхэд танилцуулсан байна.
Шүүх хуралдааны үеэр прокурорын тал Селеста болон Бёрк нарын хоорондын мессежүүдийг нотлох баримтаар гаргажээ. Уг зурвасуудад Бёрк түүнийг “ийм байдалд оруулсандаа” уучлал хүссэн бол Селеста “Бид хоёрын хэн нь ч хүүхэд харж, асрахад бэлэн биш байна. Ингэсэн нь дээр, тийм үү?” гэж хариулсан байна.
Дараа нь рэппер “Ээж минь надад ийм нөхцөлд орвол заавал энэ асуултыг асуугаарай гэж хэлдэг байсан… энэ миний хүүхэд мөн үү?” гэж асуухад Селеста “Мэдээж чинийх, Дэвид” гэж бичжээ. Эдгээр зурвас 2024 оны нэгдүгээр сард илгээгдсэн гэж мэдээлэгдэв.
“Энэ үр хөндөлт сүүлчийнх байгаасай” гэж бичсэн гэх мессежүүд
Мөн 2024 оны зургаадугаар сард Селеста түүнд “Хэрэв эхний үр хөндөлт үр дүнгүй болсон бол яах вэ?” болон “Бид жинхэнэ хүүхэдтэй болох хүртэл энэ үр хөндөлтийг сүүлчийнх болгоё” гэж бичсэн гэх мессежүүдийг шүүхэд дурдсан байна.
Los Angeles Times-ийн мэдээлснээр, 2024 оны наймдугаар сард Селеста Бёркт “Чи надад хамаатай хүн, би чиний төлөө хүүхдээ үгүй хийсэн” мөн “Би энэ тухай ярих дургүй, учир нь энэ намайг маш ихээр шаналгадаг. Гэхдээ би түүнийг буцааж авахын тулд юу ч хийх байсан” гэж бичсэн гэх баримтыг танилцуулжээ.
Тухайн үед Селеста 13 настай байсан гэж мэдээлэгдэж байна.
Шүүхэд хувийн шинжтэй зургуудын талаар мөн ярьжээ
Хуралдааны үеэр мөн хосын хувийн, ил задгай шинжтэй зургуудын талаар хэлэлцсэн байна. Прокурорын талын мэдээлснээр, эдгээр баримтууд нь насанд хүрээгүй охин болон насанд хүрсэн эрэгтэй хүний хооронд дотно харилцаа байсан гэх үндэслэлийг дэмжих зорилготой аж.
Одоогоор хэрэг шүүхээр эцэслэн шийдвэрлэгдээгүй байгаа бөгөөд Бёрк өөрт нь тулгасан ялтай холбоотойгоор хууль ёсны журмаар шүүгдэх эрхтэй хэвээр байна.
Рэпперийн автомашинаас хүний цогцосны хэсгүүд олдсон хэрэг
Өнгөрсөн есдүгээр сард d4vd-ийн автомашины ачааны хэсгээс уутанд хийсэн, мөчилсөн хүний цогцосны хэсгүүд олдсон нь энэ хэргийн эхлэл болсон юм.
Амиа алдсан хүн нь 2025 оны дөрөвдүгээр сарын 5-нд сураггүй алга болсон Селеста Ривас болох нь тогтоогдсон. Тэр алга болох үедээ 14 настай байжээ. Охиныг хуруун дээрх “Shhh…” гэсэн шивээсээр нь таньсан бөгөөд ийм шивээс d4vd-д мөн байдаг гэж мэдээлэгдсэн байна.
Прокурорын тал дотно харилцаа байсан гэж үзэж байна
Прокурорын мэдэгдсэнээр, d4vd болон Селеста Ривас нар дотно харилцаатай байсан гэх бөгөөд тухайн үед охин 13 настай, харин хөгжимчин 20 настай байжээ.
Тэд 2022 онд фэнүүдийн чатад танилцсан бөгөөд харилцаа нь хожим, ойролцоогоор 2023 оны есдүгээр сараас эхэлсэн гэж мөрдөн шалгах тал үзэж байна.
Прокурорын хувилбараар, Селеста тэдний харилцааны талаар олон нийтэд хэлж, түүний карьерыг сүйрүүлнэ гэж сүрдүүлсний дараа Дэвид түүнийг хөнөөсөн байж болзошгүй гэж буруутгаж байгаа аж.
d4vd-д хэд хэдэн ноцтой ял тулгажээ
Дэвид Бёркт хүн амины хэрэг, 14-өөс доош насны хүнд садар самуун шинжтэй үйлдэл хийсэн, мөн хүний цогцост зүй бусаар хандсан гэх ял тулгасан байна.
Мөн энэ оны дөрөвдүгээр сард түүний утаснаас хүүхдийн бэлгийн мөлжлөгтэй холбоотой байж болзошгүй 40 терабайт хэмжээтэй материал илэрсэн гэх мэдээлэл гарсан. Энэ мэдээлэл ч мөн мөрдөн шалгах ажиллагааны хүрээнд яригдаж байгаа аж.
Уран бүтээл нь ч дахин анхааралд оржээ
Энэ хэргийн дараа d4vd-ийн уран бүтээлүүд олон нийтийн анхааралд дахин өртсөн байна. Түүний алдарт “Romantic Homicide” дуунд хүчирхийлэл, үхлийн тухай утгатай мөрүүд байдаг гэж зарим хэрэглэгч онцолжээ.
Мөн Бёркийн нэг дуу “Celeste” нэртэй байдаг нь хэргийг тойрсон хэлэлцүүлгийг улам хурцатгасан байна.
Лейблүүд түүний нэрийг сайтаасаа устгасан байна
Дэвид Бёрк 2022 онд хөгжмийн ертөнцөд гарч ирсэн бөгөөд баривчлагдах үедээ Interscope болон Darkroom Records лейблүүдтэй гэрээтэй байсан гэж мэдээлэгдэж байв.
Харин одоо түүний нэр хоёр компанийн албан ёсны вэбсайтаас устгагдсан байна. Хэрэг үргэлжлэн шалгагдаж байгаа бөгөөд шүүхийн шийдвэр гарах хүртэл олон мэдээлэл албан ёсоор баталгаажаагүй хэвээр байна.
