Өмнөд Солонгосоос гараагаа эхлүүлж, унадаг дугуйгаар Төв Азийн орнуудыг зорин аялж буй Ютубэр (YouTuber) залуу Монгол Улсын нутаг дэвсгэрт явж байхдаа харамсалтайгаар дугуйгаа хулгайд алджээ. “Jung” нэртэй тус аялагч нь Хятад улсыг туулж, Оросын Владивосток, Улаан-Үд хотуудаар дамжин манай улсын хилээр нэвтэрсэн байна. Тэрээр замынхаа явцад Дархан хотод гурван хоног саатан, орон нутгийн соёлтой танилцсаны дараа цааш хөдөлсөн ч Сэлэнгэ аймгийн Зүүнхараа орчимд ийнхүү хулгайн гэмт хэргийн хохирогч болжээ.
Хэрэг явдал Зүүнхараа руу салдаг уулзварын цаахна, авто замын урд талын далангийн орчимд өрнөсөн байна. Аялагч залуу хоноглохоор бэлтгэж, замын далан руу уруудан унадаг дугуйгаа нэгэн хонхорт түр үлдээжээ. Улмаар аяны хүнд ачаагаа үүрч, майхнаа босгохоор түр холдоод буцаж ирэхэд нь үл таних хүмүүс дугуйг нь хэдийн аваад одсон байв. Олон мянган километр замыг саадгүй туулсан аялагч Монголд ирээд ийнхүү унах унаагүй болоод байна.
Элчин сайдын яам болон гэрчүүдээс тусламж хүсэж байна
Одоогоор гадаадын жуулчин аяллаа үргэлжлүүлэх боломжгүй болоод байгаа тул иргэдээс тусламж хүсэж байгаа юм. Хэрэв та бүхэн доорх шинж тэмдэг бүхий дугуйг олж харсан эсвэл уг хэргийн талаар ямар нэгэн мэдээлэл байвал холбогдох хаягаар яаралтай мэдэгдэж, туслахыг уриалж байна.
- Дугуйн марк, загвар: “Titicaca” брэндийн хар өнгийн аяллын унадаг дугуй.
- Холбоо барих хаяг: Бүгд Найрамдах Солонгос Улсаас Монгол Улсад суугаа Элчин сайдын яам.
