Монгол бөхийн өргөөнд БНМАУ-ын арслан, “Нахиу” хэмээн алдаршсан Шагдарын Санжсүрэнгийн нэрэмжит аймаг, цэрэг, сумын цолтой 512 бөхийн барилдаан амжилттай зохион байгуулагдлаа. Завхан аймгийн Сантмаргац сумын харьяат домогт арсланг дурсан хүндэтгэх энэхүү барилдаанд хүчит бөхийн уран мэх, эр бял жигдэрсэн сонирхолтой барилдаанууд өрнөв.
Есөн давааны турш хүч үзсэний эцэст Булган аймгийн Могод сумын харьяат, “Булган Хангай” дэвжээний бөх, аймгийн арслан Мягмаржаргалын Эрхэмбаяр түрүүлж, наадамч олноо баярлууллаа. Тэрбээр шийдвэрлэх даваанд Ховд аймгийн Чандмань сумын харьяат, “Ховд” дэвжээний бөх, аймгийн хурц арслан Уламбаярын Батцоожийг өвдөг шороодуулснаар үзүүр түрүүний эзэн болсон юм.
Барилдааны их шөвөгт дараах бөхчүүд шалгарлаа:
- Э.Мөнхбаатар (Говьсүмбэр аймгийн Сүмбэр сумын харьяат, аймгийн хурц, бадрангуй арслан)
- Г.Мөнхбаяр (Архангай аймгийн Хайрхан сумын харьяат, аймгийн арслан)
Харин дунд шөвгийн наймд аймгийн арслан Б.Баянсүх, Б.Нямсамбуу, М.Баяржавхлан болон аймгийн заан И.Доржсамбуу нар үлдэж, өөрсдийн ур чадвараа гайхуулав.
Тэмцээний зохион байгуулагчдын зүгээс барилдааны явцад онцгойрсон бөхчүүдэд тусгай шагналуудыг гардуулсан юм. Үүнд:
- “Уран барилдаан”-ы шагнал: Х.Чойжилсүрэн (Дундговь аймгийн Эрдэнэдалай сумын харьяат, аймгийн арслан)
- “Уран гараа, дэвээтэй бөх”-ийн шагнал: Б.Эрболд (Хөвсгөл аймгийн Улаан-Уул сумын харьяат)
- “Өсөх ирээдүйтэй бөх”-ийн шагнал: А.Буянжаргал (Завхан аймгийн Тосонцэнгэл сумын харьяат, сумын заан)
Бөхийн хорхойтнуудын анхаарал одоо тавдугаар сарын 9-ний өдөр болох дараагийн барилдаан руу шилжиж байна. Энэ өдөр 13:00 цагаас Ховд аймгийн Дөргөн сумын түүхт 70 жилийн ой, улсын начин Л.Бандихүүгийн нэрэмжит улс, аймаг, цэргийн цолтой 128 бөхийн барилдаан болох тов гарчээ.
