Улаанбаатар хотын замын хөдөлгөөний нягтаршлыг сааруулах, гол замуудын ачааллыг тэнцвэржүүлэх зорилгоор Баянзүрх дүүрэгт шинэ холбоос зам тавихаар боллоо. Тодруулбал, тус дүүргийн 13 дугаар хорооны нутаг дэвсгэр буюу Офицеруудын тойргоос урагш, “Сүнжин гранд” зочид буудлын даланг даган Нарны замтай нийлэх хоёр км урттай авто замын ажил эхэлж байна.
Энэхүү бүтээн байгуулалтын талаар нийслэлийн Замын хөгжлийн газрын Зам барилгын хяналтын хэлтсийн ахлах мэргэжилтэн Б.Түшиг-Эрдэнэ дэлгэрэнгүй тайлбар өгсөн юм. Тэрбээр уг төслийн ач холбогдол болон төлөвлөгөөг дараах байдлаар танилцууллаа:
“Тус замыг хоёр эгнээтэй, хоёр талаараа явган хүний замтай барина. Мөн борооны ус зайлуулах шугам болон гэрэлтүүлэг хийнэ. Гүйцэтгэгчээр “Шинэ хотын цамхаг” ХХК шалгарсан. Уг замыг дөрөвдүгээр сарын 1-нээс аравдугаар сарын 30-ны хооронд гүйцэтгэнэ. Нийт 18 нэгж талбарт газар чөлөөлөлт хийх бөгөөд өнөөдрийн байдлаар газар чөлөөлөлт үргэлжилж байна. Уг зам ашиглалтад орсноор Энхтайваны өргөн чөлөөг Нарны замтай холбосон шинэ холбоос зам бий болно. Мөн офицеруудын тойрог болон Нохойтой хөшөө орчмын замын ачааллыг бууруулах юм” хэмээн тэрбээр онцлов.
Шинэ зам ашиглалтад орсноор гарах эерэг өөрчлөлтүүд:
- Зүүн бүсээс хотын төв рүү чиглэх тээврийн хэрэгслийн урсгал Нарны зам руу шууд нэвтрэх боломж бүрдэнэ.
- Офицеруудын тойрог болон Нохойтой хөшөө орчмын байнгын түгжрэл мэдэгдэхүйц багасна.
- Явган зорчигчид стандартад нийцсэн зам, гэрэлтүүлэгтэй орчинд зорчих нөхцөл бүрдэнэ.
- Орчин үеийн ус зайлуулах системтэй тул хур тунадасны үед зам дээр тогтоол ус үүсэх асуудал шийдэгдэнэ.
Төслийн хугацаанд замын трасст орсон 18 нэгж талбарын газар чөлөөлөх ажил эрчимтэй хийгдэж байгаа бөгөөд ирэх 11 дүгээр сар гэхэд нийслэлчүүд шинэ замаараа зорчиж эхлэхээр төлөвлөгджээ.
