Хятадын Жэжян их сургуулийн эмнэлгийн эмч нар зүрх нь 40 гаруй цагийн турш зогссон өвчтөнийг аварч чадсан анагаах ухааны нэгэн ховор тохиолдол гарчээ. Энэхүү ер бусын үйл явдлын талаар “Sohu” хэвлэл мэдээллээ.
40 настай эрэгтэй амьсгал давчдах, цээжээр нь шахаж өвдөх зовиуртай эмнэлэгт хандсан байна. Түүнийг эмнэлэгт байх үед зүрх нь гэнэт зогсжээ. Үүний шалтгаан нь вирусийн халдвараас үүдэлтэй зүрхний булчингийн хүчтэй үрэвсэл буюу цочмог миокардит (myocarditis) байсан гэж эмч нар таамаглаж байна.
Өвчтөний зүрхний ховдлын жирвэгнээ буюу зүрх цусыг шахах чадваргүй болох аюултай хэм алдагдал (ventricular fibrillation) үүссэн байлаа. Дефибриллятор буюу зүрхний цохилт сэргээгч аппарат ашиглан зүрхийг нь “ажиллуулах” гэсэн оролдлогууд бүгд амжилтгүй болжээ.
Иймээс эмч нар өвчтөнийг ЭКМО (ECMO — зүрх болон уушгины үүргийг түр хугацаанд орлох систем) аппаратад холбож, цусны эргэлтийг дэмжин, судасны бүлэгнэл үүсэхээс сэргийлэх арга хэмжээнүүдийг авсан байна.
Эрчимт эмчилгээ хийснээс хойш 40 гаруй цаг өнгөрөхөд өвчтөний зүрх аажмаар сэргэж, хэмнэл нь хэвийн болж эхэлжээ. ЭКМО аппарат түүний биеийг дахин 10 орчим хоног дэмжсэн байна. Ингээд 20 хоногийн дараа өвчтөн бүрэн ухаан орж, биеийн байдал нь сайжирсаар ноцтой хүндрэлгүйгээр эмнэлгээс гарчээ.
Ийм тохиолдол маш ховор бөгөөд орчин үеийн анагаах ухааны технологи, нарийн мэргэжлийн эмч нарын шуурхай ажиллагаа болон хувь тавилангийн ач гавьяа гэдгийг мэргэжилтнүүд онцолж байна. ЭКМО ашиглан зүрх нь удаан хугацаанд зогссон хүнийг аварсан тохиолдол өмнө нь гарч байсан ч энэ удаагийнх шиг үр дүн нь анагаах ухааны практикт онцгой үзэгдэл хэвээр байна.
