Төрийн тэргүүний албыг хашиж байсан хэдий ч УИХ-ын гишүүний үүрэгт ажилдаа хариуцлагагүй ханддаг, чуулганы нэгдсэн хуралдааныг тогтмол тасалдгаараа Х.Баттулга гишүүн олны анхаарлын төвд байсаар байна. Түүнийг олон нийт “алдарт таслагч” хэмээн нэрлэх нь ч бий.
Тэрбээр 2024 оны намрын чуулганы үеэр нийт 40-өөс дээш цаг хурал тасалсан нь тогтоогдож, Ёс зүйн байнгын хорооноос 7 сая 320 мянган төгрөгөөр торгуулж байв. Хэдийгээр “Ээж чуулгандаа суу гэж загнасан одоо сууна” хэмээн ярьж байсан ч бодит байдал дээр түүний ирц төдийлөн сайжраагүй юм. Чуулган бүрийн нээлтэд дээлээ өмсөж ирээд л үзэгдээд өнгөрдөг түүний таслалтын түүхийг сөхвөл:
- Есдүгээр сард: 1 удаа
- Аравдугаар сард: 4 удаа
- Арваннэгдүгээр сард: 10 удаа
- Арванхоёрдугаар сард: 3 удаа чуулган тасалжээ.
Эдгээр хугацаанаас бусад үед тэрбээр ихэвчлэн эмнэлгийн чөлөөтэй эсвэл гадаад томилолттой гэх шалтгаанаар хуралдаанаас хоцордог байна.
Гишүүнийг эргүүлэн татах хуулийн төсөл ба түүний байр суурь
Одоогийн Ерөнхийлөгч У.Хүрэлсүхийн зүгээс хариуцлагагүй, хуралдаа суудаггүй гишүүдийг эргүүлэн татах агуулга бүхий хуулийн төслийг санаачлан өргөн барьсан билээ. Уг хуулийн төслийн хэлэлцүүлгийн үеэр Х.Баттулгыг чуулганд суудаггүй хэмээн нэр цохон шүүмжилж, эргүүлэн татах асуудлыг хөндөж байсан юм.
Гэтэл өчигдөр тэрбээр Төрийн ордонд сэтгүүлчидтэй таарах үедээ “Хуралдаа суудаггүй гишүүдийг эргүүлэн татах хэрэгтэй” хэмээн мэдэгдсэн нь олны гайхшралыг төрүүлэв. Энэ нь нэг талаас Ерөнхийлөгчийн өргөн барьсан хуулийн төслийг дэмжиж буй мэт боловч, нөгөө талаас хамгийн их таслалттай гишүүдийн нэг болох өөрийгөө эргүүлэн татах ёстой гэдгийг шууд бусаар хүлээн зөвшөөрсөн сонирхолтой үйлдэл боллоо.
