Урлагийн түүхэнд нэгэн гайхалтай нээлт тохиолоо. Англи улсаас Сэргэн мандалтын үеийн суут зураач Рафаэль Сантигийн бүтээсэн гэгдэх “Мария Магдалина” зураг олджээ. Энэхүү олдвор нь Флоренц хотын Палатина галерейд хадгалагдаж буй, удаан хугацааны турш Пьетро Перужиногийн ажил гэж тооцогдож ирсэн ижил нэртэй бүтээлийн эх хувь мөн эсэхэд эргэлзээ төрүүлж эхлэв.
Англиас олдсон уг зураг нь буруу хаяглагдсан болон техникийн оролцоотойгоор (зургийн модон суурийг хожуу үеийн будгаар дарж нуусан байсан) олон зууны турш анзаарагдалгүй иржээ. “Open Science” платформ дээр нийтлэгдсэн орчин үеийн судалгаагаар хими-физикийн шинжилгээ болон архивын баримтуудад тулгуурлан Рафаэлийн зохиол байх магадлалтайг тогтоосон байна.
Нээлтийн гол нотолгоонууд:
- Архивын баримт: Урбиногийн гүнгийн архивын бичиг баримтад Франческо Мария II делла Роверег нас барсны дараа алга болсон Рафаэлийн “Мария Магдалина” зургийн тухай дурдсан байдаг нь гол сэжүүр болжээ.
- Инфратуяаны шинжилгээ: Инфратуяаны зураг авалтаар Англиас олдсон хувилбар дээр зураачийн хийсэн засвар, өөрчлөлтүүд (pentimenti) илэрсэн байна. Энэ нь эх хувьд байдаг гол шинж тэмдэг бөгөөд Флоренц дахь хувилбарт ийм ул мөр байхгүй байгаа нь түүнийг “хуулбар” байх магадлалыг нэмэгдүүлж байгаа юм.
- Техник ажиллагаа: Англи хувилбарын будгийн давхарга нь маш нимгэн, чадварлаг хийгдсэн бол Флоренцын хувилбарын бийрийн тавилт нь харьцангуй бүдүүн байгааг шинжээчид онцолжээ.
- Зохиомжийн ялгаа: Англи хувилбарт бүсгүйн толгойн гивлүүр гарны шугамтайгаа маш эвлэгхэн уусэж харагддаг бол Флоренцын зурагт энэ хэсэг бүрзийж, тодорхойгүй харагддаг байна. Мөн дээрх “S. Maria Madalena” гэсэн бичээс нь латин хэлээр бус тухайн үеийн ярианы хэлээр бичигдсэн нь Сэргэн мандалтын оргил үеийн бүтээлүүдэд ховор тохиолдох сонирхолтой деталь юм.
Хэрэв судлаачдын дүгнэлт эцэслэн батлагдвал энэ нь Палатина галерейн үнэт бүтээлүүдийн нэгийг дахин үнэлэхэд хүргэж, Рафаэлийн уран бүтээлийн өв залгамжлалын тухай ойлголтыг үндсээр нь өөрчлөх ач холбогдолтой юм.
