Норвегийн прокурор Стурла Хенриксбё угсаа залгамжлах гүнж Метте-Маритын хүү Мариус Борг Хёйбид долоон жил долоон сар хорих ял оноох санал гаргалаа.
NRK болон Mongolnews24.com сайтын мэдээлснээр, Хёйби нь дөрвөн удаагийн хүчирхийлэл, гэр бүлийн хүчирхийлэл, хар тамхины ноцтой хэрэг, амь насанд заналхийлсэн, шүүхийн шийдвэр зөрчсөн зэрэг нийт 38 гэмт хэрэгт буруутгагдаж байгаа юм.
Тэрээр зарим хэргээ хүлээсэн ч хамгийн ноцтой яллах дүгнэлтүүдийг үгүйсгэж байна. Угсаа залгамжлах гүнжийн хүү шүүх хурал эхлэхийн өмнөх өдөр буюу хоёрдугаар сарын 2-нд Осло хотод баривчлагджээ. Шүүх ажиллагааг анх гуравдугаар сарын 19-нд дуусгахаар төлөвлөж байсан ч шүүгч бие нь тавгүйрхсэний улмаас үйл явц сунжирч магадгүй байна.
Өдгөө 29 настай Хёйби нь гүнж Метте-Маритын өмнөх харилцаанаас төрсөн том хүү бөгөөд угсаа залгамжлах хунтайж Хоконы дагавар хүү юм. Тэрээр ямар нэгэн язгууртны хэргэм зэрэггүй бөгөөд хааны гэр бүлийн албан ёсны үүрэг гүйцэтгэдэггүй ажээ.
