Нийслэлийн удирдлагуудын 2026 оны гуравдугаар сарын 17-ны өдрийн шуурхай зөвлөгөөнөөр Хан-Уул дүүргийн 22 дугаар хороо, Зайсангийн аманд байрлах “Богд уул” сувиллын барилгыг нийслэлийн өмчид эргүүлэн авч, зориулалтыг нь өөрчлөн шинэчлэх шийдвэр гаргалаа. Хотын дарга Х.Нямбаатар тус байгууламжийг засварлаж, нийгмийн нэн шаардлагатай хоёр чиглэлээр үйлчилгээ үзүүлэх сувилал болгох төлөвлөгөөг танилцуулсан юм.
Уг төслийн хүрээнд хэрэгжих үндсэн ажлууд болон төсөвлөсөн зардлыг тоймловол:
- Зөнөгрөлийн сувилал: Ой санамжийн доройтолтой, байнгын асаргаа шаардлагатай иргэдэд зориулсан тусгай төвийг “Богд уул” сувиллын барилгыг засварлан байгуулна. Үүнд 2.8 тэрбум төгрөгийн их засварын зардал төсөвлөжээ.
- Эх, нярайн сэргээн засах төв: Шинээр баригдах эх, нярайн асаргааны төвийн барилгыг 2026-2028 онд хоёр жилийн хугацаанд 16.8 тэрбум төгрөгөөр босгохоор төлөвлөв.
- Нийт хөрөнгө оруулалт: Хоёр төслийн нийт зардал 19.6 тэрбум төгрөг байх бөгөөд үүнийг нийслэлийн төсвөөс санхүүжүүлнэ.
Өмнө нь Ж.Хатанбаатар нарын удирдаж байсан “Элэг судлалын клиник төв”-д менежментийн гэрээгээр ашиглуулж байсан шийдвэрийг хүчингүй болгосноор 1959 онд ашиглалтад орсон 3.9 га талбай бүхий тус эзэмшил нийслэлийн мэдэлд бүрэн шилжсэн байна. Хуучнаар сүрьеэгийн больницийн зориулалттай байсан уг барилгыг ийнхүү орчин үеийн стандартын дагуу шинэчилснээр нийслэлийн эрүүл мэндийн салбарын хүртээмжийг нэмэгдүүлэх стратегийн ач холбогдолтой юм.
Хотын дарга Х.Нямбаатар “Сүүлийн жилүүдэд зөнөгрөх өвчтэй иргэдийг асрах асуудал айл өрхүүдэд маш том ачаалал болж байна. Тиймээс төрөөс энэ чиглэлийн тусгай сувилал байгуулж, иргэдийнхээ нийгмийн хэрэгцээг хангах нь нэн тэргүүний зорилт” хэмээн онцолсон юм. Засварын ажил нэг жилийн хугацаанд үргэлжлэх бөгөөд зөнөгрөлийн сувилал эхний ээлжинд ашиглалтад орохоор төлөвлөгдсөн байна.
