Америкийн кино академийн 98 дахь удаагийн “Оскар”-ын шагнал гардуулах ёслолын бэлтгэл ажил “өндөржүүлсэн бэлэн байдал”-ын дор үргэлжилж байна. Холбооны мөрдөх товчоо (ФБР)-ийн тагнуулын мэдээллээр Иран улс АНУ-ын Баруун эрэг рүү “гэнэтийн дайралт” хийж магадгүй байгаа нь ийнхүү аюулгүй байдлыг чангатгахад хүргэжээ. Энэ жилийн улаан хивсний ёслолд Брэд Питт, Николь Кидман, Тимоти Шаламе зэрэг дэлхийн хэмжээний одод оролцох хүлээлттэй байгаа ч тэдний аюулгүй байдал зөвхөн бие хамгаалагчдаас бус, агаарын довтолгооноос хамгаалах системээс хамаарах болоод байна.
Нэвтрүүлгийн продюсер Раж Капур тэдний баг Холбооны мөрдөх товчоо болон Лос-Анжелес хотын цагдаагийн газартай (LAPD) нягт хамтран ажиллаж байгааг батлав.
“Бид зочин бүрийг аюулгүй, хамгаалагдсан орчинд байгаагаа мэдрээсэй гэж хүсэж байна. Тиймээс продюсерын багийн зүгээс үүнийг хангах нь бидний гол үүрэг юм. Бид ФБР болон LAPD-ийн бүрэн дэмжлэгтэйгээр нягт хамтран ажиллаж байна. Энэхүү ёслол цаг шиг нарийн ажиллах ёстой” гэж Капур мэдэгджээ.
Лос-Анжелес тойргийн шериф хууль хяналтынхан хамгийн хүнд нөхцөл байдалд, тэр дундаа ганцаарчилсан террорист халдлага эсвэл хорлон сүйтгэх бүлэглэлүүдийн үйлдлээс сэргийлэхэд бэлэн байгааг онцоллоо. Тус газрын албан ёсны мэдэгдэлд “Дэлхий дахинд үүсээд буй нөхцөл байдалтай холбогдуулан манай газар өндөржүүлсэн бэлэн байдалд ажиллаж байна. Бид ганцаарчилсан халдагчид, ‘сплячі осередки’ буюу унтаа үүрүүд (даалгавар хүлээж буй нууц бүлэглэл) болон технологийн дэвшилтэт кибер халдлага зэрэг бүх төрлийн аюул заналхийллийг анхааралдаа авсан” гэжээ.
Энэхүү болгоомжлол нь 2-р сарын 28-ны өдөр АНУ болон Израиль улс Ираны дээд удирдагч Али Хаменеиг устгасантай холбоотой юм. Үүний хариуд Тегеран Ойрхи Дорнод дахь Америкийн цэргийн баазууд руу хэдийнэ цохилт өгөөд байгаа бөгөөд одоо АНУ-ын эх газар руу дрон ашиглан халдаж магадгүй гэж ФБР үзэж байна.
“Variety” сэтгүүлийн мэдээлснээр ёслол болох газарт хамгаалалтын ажилтнуудын тоог үлэмж нэмэгдүүлсэн ч зочид болон шүтэн бишрэгчдэд саад болохгүйгээр, аль болох анзаарагдамгүй ажиллахыг хичээж байгаа аж. Ийнхүү аюулгүй байдлын асуудал хурцаар тавигдаж буй энэ үед 16 номинацид нэр дэвшсэн “Нүгэлтнүүд” (Sinners) уран сайхны кино энэ жилийн гол фаворитоор нэрлэгдсэн хэвээр байна.
Эх сурвалж: New York Post
