Хүний эрхийн үндэсний комисс цахим орчинд тархсан өсвөр насны хүүхдүүд үе тэнгийнхнээ дээрэлхэж, хүчирхийлж буй бичлэгтэй холбоотой асуудлаар мэдээлэл хийлээ. Комиссын гишүүн Ж.Хунан энэ үеэр хүүхдийн хүчирхийлэл, үе тэнгийн дээрэлхэлт, ялгаварлан гадуурхалт нь ямар ч нөхцөлд хүлээн зөвшөөрөх боломжгүй үйлдэл болохыг онцлон тэмдэглэв.
Тэрбээр хүүхдүүдэд эрүүл, аюулгүй орчин бүрдүүлж, зөв хүмүүжил олгох асуудалд гэр бүл, сургууль, нийгмийн бүх оролцогч талууд анхаарах шаардлагатайг дурдсан юм. ХЭҮК сүүлийн жилүүдэд үе тэнгийн дээрэлхэлтийн асуудлыг тогтмол хөндөж, боловсролын салбар дахь хүний эрхийн мониторингийн хүрээнд хийсэн сүүлийн гурван илтгэлдээ энэ асуудлыг тусгаж ирсэн байна.
Мөн боловсролын байгууллагуудад хүүхэд хамгааллын тогтолцоо хангалтгүй байгааг онцолж, энэ чиглэлээр 2026 оны нэгдүгээр сарын 30-нд ХЭҮК-ын даргын зөвлөмжийг боловсролын асуудал эрхэлсэн сайдад хүргүүлжээ. Тус зөвлөмж нь хүүхдийн хүчирхийлэл, үе тэнгийн дээрэлхэлтээс урьдчилан сэргийлэх, хүүхдийн аюулгүй байдлыг хангах арга хэмжээг сайжруулахад чиглэсэн байна.
Сүүлийн жилүүдэд хүүхдийн эсрэг гэмт хэрэг нэмэгдэх хандлагатай байгааг ХЭҮК анхаарууллаа. Тухайлбал:
- Бэлгийн хүчирхийллийн хохирогч болсон хүүхдийн тоо 2021 онд 278, 2025 онд 436 болж өссөн
- Хүүхдийн амиа хорлолт 2021 онд 62, 2022 онд 54, 2023 онд 46, 2024 онд 62 бүртгэгдсэн
- Гэмт хэргийн улмаас нас барсан хүүхэд 2021 онд 83, 2024 онд 111 болсон
- Гэмт хэргийн улмаас гэмтсэн хүүхдийн тоо 2021 онд 550, 2024 онд 997 болж нэмэгдсэн
Ж.Хунан хүүхэд хамгааллын тогтолцоог бодитоор сайжруулах шаардлагатай байгааг мөн онцлов. Тэрбээр сургууль бүрт хүүхдийн эрхийг хамгаалах чиг үүрэг бүхий бүтэц байдаг ч бодит үр дүн хангалтгүй байгааг дурдсан юм.
Түүнчлэн дараах асуудлуудыг сайжруулах шаардлагатай гэж үзжээ.
- Хүүхэд хамгааллын хамтарсан багийн үйл ажиллагаа
- Хамгааллын цэгийн хүртээмж
- Санхүүжилт болон мэргэжлийн боловсон хүчний тоо
Хүүхдийн гаргасан гомдол, мэдээлэлд шуурхай хариу үзүүлж, анги хамт олон, гэр бүлийн оролцоотойгоор асуудлыг шийдвэрлэх нь чухал болохыг тэрбээр онцолсон. Мөн насанд хүрэгчид өөрсдийн харилцаа, хандлагаараа хүүхдэд үлгэрлэдэг учраас хүүхдийн өмнө хүлээх хариуцлагаа ухамсарлах шаардлагатайг тэмдэглэжээ.
