Засгийн газрын 2026 оны гуравдугаар сарын 11-ний өдрийн ээлжит хуралдаанаар улс орны үндэсний аюулгүй байдалд ноцтой заналхийлж буй хар тамхины асуудлыг хэлэлцлээ. Хуралдаанаар Мансууруулах эм, сэтгэцэд нөлөөт бодисын эргэлтэд хяналт тавих тухай хуулийн шинэчилсэн найруулгын төслийг дэмжиж, УИХ-д өргөн барихаар тогтсон тухай Хууль зүй, дотоод хэргийн дэд сайд Д.Мөнх-Эрдэнэ мэдээлэв.
Түүний онцолсноор, 2002 онд энэ төрлийн гэмт хэрэг ердөө хоёр бүртгэгдэж байсан бол 2025 онд гэмт хэрэг 307, зөрчил 394 болж огцом өсжээ. Энэ нь өмнөх оны мөн үетэй харьцуулахад гэмт хэрэг 20 хувь, зөрчил 26.6 хувиар нэмэгдсэн үзүүлэлт юм. Иймд төрөөс хяналтын тогтолцоог чангатгаж, дараах үндсэн шинэчлэлүүдийг хуулийн төсөлд тусгаад байна:
- Урьдчилан сэргийлэх, соён гэгээрүүлэх: Хар тамхины хор уршгийг олон нийтэд таниулах, соён гэгээрүүлэх ажлыг эрчимжүүлнэ.
- Хууль сахиулах байгууллагын чадавх: Хар тамхитай тэмцэх албаны техник, хүний нөөцийг бэхжүүлж, төрийн байгууллагуудын харилцан үйлчлэлийг тодорхой болгоно.
- Үндэсний жагсаалт: Шинэ төрлийн мансууруулах бодисуудыг шуурхай бүртгэж, хариуцлага тооцох боломжтой Үндэсний жагсаалтыг бий болгоно.
- Шийтгэлийн бодлогыг чангатгах: Өнөөдрийн байдлаар зөвхөн таван төрлийн бодист эрүүгийн хариуцлага хүлээлгэж байгааг өөрчилж, илүү ноцтой үйлдлүүдийг торгоод өнгөрдөг тогтолцоог хална.
Сүүлийн есөн жилийн судалгаагаар энэ төрлийн хэрэгт холбогдогчдын дийлэнх нь 13-35 насны залуучууд байгаа бөгөөд үүний дотор 107 хүүхэд байна. Хуулийн төсөлд хүүхэд, өсвөр үеийнхнийг хамгаалах зорилгоор ялын бодлогыг эрс чангатгахаар тусгажээ. Тухайлбал, хүүхдийг мансууруулах бодис хэрэглэхэд уруу татсан этгээдэд одоо мөрдөгдөж буй 1-5 жилийн хорих ялыг нэмэгдүүлж, 15 жил хүртэл хугацаагаар хорих хатуу зохицуулалтыг оруулсан байна.
Төрийн зүгээс хар тамхины асуудлыг Үндэсний аюулгүй байдлын хэмжээнд авч үзэж, донтох эмгэгтэй иргэдэд авах арга хэмжээг илүү тодорхой, үр дүнтэй болгохоор зорьж байгааг дэд сайд Д.Мөнх-Эрдэнэ нэмж тодотголоо.
