Монгол өв соёл, уламжлалт спортыг дэлхийн тавцанд сурталчлах зорилго бүхий Дэлхийн монголчуудын анхдугаар наадам 2025 оны зургадугаар сарын 28-нд Бельгийн нийслэл Брюссель хотноо анх удаа зохион байгуулагдахаар болжээ.
Наадмын хүрээнд дараах үйл ажиллагаанууд болох юм:
- Хүчит бөхийн барилдаан
- Сурын харваа
- Шагайн харваа
- Үндэсний хоол, бүтээгдэхүүний үзэсгэлэн худалдаа
- Урлагийн тоглолт
Монгол ахуй, урлаг, спортын уламжлалыг нэг дор цогцлоосон уг арга хэмжээ нь гадаад дахь монгол иргэдийг хамтад нь нэгтгэх, эх орноос хол суугаа иргэдийн дунд эх хэл, соёл, бахархлаа сэргээх, түгээн дэлгэрүүлэх зорилготой.
Тэмцээнд оролцох сонирхолтой иргэд Европ дахь Монгол Улсын Элчин сайдын яам болон тухайн спортын төрөлтэй холбоотой мэргэжлийн холбоодод урьдчилан бүртгүүлж, оролцох эрхээ баталгаажуулах шаардлагатай.
Энэхүү наадам нь Монгол Улсын “Алсын хараа 2050” урт хугацааны хөгжлийн бодлогын хүрээнд гадаадад амьдарч буй монгол иргэдэд зориулсан анхны томоохон соёл, спортын эвент болохоороо онцлогтой юм.
