“Огцрох амархан” нэртэй эсэргүүцлийн жагсаал өнөөдөр буюу 2025 оны 5-р сарын 19-нд зургаа дахь өдрөө Сүхбаатарын талбайд үргэлжилж байна. Иргэд, ялангуяа залуусын оролцоо өндөр байгаа уг жагсаал нь Ерөнхий сайд Л.Оюун-Эрдэнийг албан тушаалаасаа огцрохыг шаардсан агуулгатай бөгөөд тэд энэ шаардлагад тодорхой хариу иртэл тайван хэлбэрээр үргэлжлүүлнэ гэж мэдэгдэж байгаа юм.
Жагсаалд улс төрчид, олны танил хүмүүс нэгдэж эхэллээ
Сүүлийн өдрүүдэд жагсаалд нэгдэх иргэдийн тоо нэмэгдэхийн зэрэгцээ УИХ-ын гишүүд, олон нийтэд танигдсан хүмүүс ч өөрсдийн байр сууриа илэрхийлж оролцох болжээ. Тухайлбал:
- УИХ-ын гишүүн Ч.Лодойсамбуу
- УИХ-ын гишүүн С.Цэнгүүн
эдгээр гишүүд жагсаалд биечлэн ирж, шаардлагад гарын үсэг зурсан бөгөөд төв талбайг чөлөөлж, асруудыг татан буулгахыг албан ёсоор шаардаж байгаа юм.
Иргэдийн дэмжлэг нэмэгдэж байна
Зөвхөн УИХ-ын гишүүд гэлтгүй, жагсаалд оролцохгүй ч үзэл бодлоо цахимаар болон олон нийтийн сүлжээгээр илэрхийлж буй олон иргэд ч талбайг чөлөөлөх шаардлагыг дэмжиж буйгаа илэрхийлжээ.
Жагсаал зохион байгуулагчдын дэвшүүлсэн үндэслэлүүд
Ерөнхий сайд Л.Оюун-Эрдэнийг огцрох ёстой гэж үзэж буй жагсагчдын зүгээс дараах үндэслэлүүдийг олон нийтэд мэдээлж, гарын үсэг цуглуулах кампанит ажлыг эхлүүлсэн байна. Үүнд:
- Инфляци, үнийн өсөлтийг хянах бодит үр дүнтэй арга хэмжээ авч чадаагүй
- Ажилгүйдэл, ядуурлын түвшин буураагүй
- Түүхэнд байгаагүй их хэмжээний төсөв баталсан ч зарцуулалт нь ил тод биш
- Хамтарсан Засгийн газар байгуулснаар сөрөг хүчний үүрэг алдагдсан
- Монгол Улс ардчиллын индексээр “сонгуулийн автократ” ангилалд орсон
- Хэвлэлийн эрх чөлөөний орчин хумигдсан
- Ерөнхий сайд Ж.Баярмаа гишүүнд зохисгүй хандсан нь парламентын соёл, эмэгтэйчүүдийн эрхэд халдсан үйлдэл болсон
- Ерөнхий сайдын хүү О.Тэмүүлэнгийн тансаг хэрэглээний эх үүсвэр тодорхойгүй байна
