АНУ-ын Нью-Йорк хотноо зохион байгуулагдсан “WINGS Women of Discovery Awards” ёслолын үеэр Зэрлэг амьтан судлах, хамгаалах төвийн экологич Ч.Баярмаа 2026 оны шилдэг дөрвөн эмэгтэй судлаачийн нэгээр шалгарч, олон улсын нэр хүндтэй шагналын эзэн боллоо. Тус байгууллага нь шинжлэх ухаан, байгаль хамгаалал болон газарзүйн судалгааны салбарт бодит үр дүн гарган манлайлж буй шилдэг эмэгтэй судлаачдын төсөл, шинжлэх ухааны нээлтүүдийг дэмжих зорилгоор санхүүжилт бүхий шагналыг жил бүр уламжлал болгон олгодог юм.
25 насандаа түүхэн амжилт тогтоож, дэлхийн шилдгүүдтэй мөр зэрэгцэв
Ч.Баярмаа нь 25 насандаа энэхүү нэр хүндтэй шагналыг хүртсэнээр “WINGS Women of Discovery”-ийн түүхэн дэх хамгийн залуу шагналтан болж, онцгой амжилтын эзэн боллоо.
Энэ удаагийн тэтгэлэгт шагналыг түүний хамт дэлхийн шинжлэх ухааны салбарт хүлээн зөвшөөрөгдсөн дараах нэр хүндтэй эрдэмтэд гардан авсан байна:
- АНУ-ын Смитсонианы хүрээлэнгийн дэд захирал, гараг эрхэс судлаач, НАСА-гийн Шинжлэх ухааны асуудал хариуцсан захирал асан доктор Эллен Стофан,
- Мөсөн гол болон дэлхийн уур амьсгалын өөрчлөлтийг судалдаг доктор Алисон Крисчителло,
- Амазоны ширэнгэн ойн бичил биетэн, биологийн олон янз байдлын нөлөөллийг судалдаг хими биологич доктор Роса Васкес Эспиноса.
Ховор амьтдын судалгаа ба докторын ажил
Экологич Ч.Баярмаа нь Зэрлэг амьтан судлах, хамгаалах төвд ажиллах хугацаандаа Монгол бөхөн болон бэлчээрийн малын идэш тэжээлийн экологийн нарийвчилсан судалгаагаар магистрын зэргээ амжилттай хамгаалж байжээ. Одоогоор тэрбээр Их Британийн нэр хүндтэй Сэнт Эндрюсийн их сургуульд докторын зэргээ ахиулан суралцаж буй бөгөөд Монгол бөхөн, цоохор ирвэс, нөмрөг тас зэрэг олон улсад нэн ховордсон амьтдын шилжилт хөдөлгөөн, зан авирын экологийг орчин үеийн арга зүй, дэвшилтэт технологийн тусламжтайгаар өргөн хүрээнд судалж байна.
Дэлхийн тэргүүлэх агентлаг, судалгааны байгууллагуудын туршлагатай эрдэмтэдтэй нэгэн дэвжээнд нэрлэгдэж, Монгол орны биологийн олон янз байдал, экосистемийн үнэ цэнийг олон улсын тавцанд сурталчлан таниулж буй нь Монголын байгаль хамгаалал, шинжлэх ухааны салбарт томоохон байр суурь эзэлсэн үйл явдал боллоо. Энэхүү амжилт нь Монголын залуу эрдэмтэн, эмэгтэй судлаачдын дэлхийн түвшний чадавхыг батлан харуулаад зогсохгүй олон улсын хамтын ажиллагаа, санхүүжилтийг эх орныхоо байгаль хамгааллын салбарт татах бодит гүүр болж байна.
