Британийн аялагч Карл Бушби 28 жил үргэлжилсэн дэлхийг тойрсон аяллаа дуусгаж байна. Энэ хугацаанд тэр дөрвөн тив, 30 орноор дамжин ойролцоогоор 50 мянган км зам туулжээ. Өдгөө 57 настай Бушби Английн төрөлх Халл хотдоо хүрээд байгаа бөгөөд түүнийг хүндэтгэлтэйгээр угтан авах гэж байна.
Британийн десантын цэрэг асан Бушби 1998 оны 11-р сарын 1-нд Чилийн Пунта-Аренас хотоос аяллаа эхлүүлжээ. Тухайн үед тэр 29 настай байсан бөгөөд 12 жилийн дотор гэртээ буцна гэж төлөвлөсөн ч цаг агаар, бичиг баримтын саад бэрхшээл болон бусад нөхцөлөөс шалтгаалан аялал нь бараг гурван арван жил үргэлжилсэн байна.
Тэр маршрутаа “Голиатын экспедиц” хэмээн нэрлэж, хоёр үндсэн дүрэм тогтоожээ:
- урагшлахын тулд ямар ч тээврийн хэрэгсэл ашиглахгүй байх;
- аяллаа бүрэн дуусгахаас нааш Их Британид буцаж очихгүй байх.
Цөл, ширэнгэн ой, мөсөн хоолойг туулсан 28 жил
Бушби олон жилийн турш цөл, ширэнгэн ой, хөлдсөн тундрыг туулжээ.
2001 онд тэр Өмнөд ба Төв Америкийн хооронд орших, халуун орны ой болон уулархаг бүс бүхий нэвтрэхэд маш хүндрэлтэй Дарьены завсар нутгийг гаталсан байна. Тэнд зэвсэгт мөргөлдөөнтэй бүсүүдээс зайлсхийх шаардлагатай болжээ. Хожим Панамын хаалттай хилийн бүсийг давсныхаа дараа тэр 18 хоног шоронд хоригдсон байна.
Колумбид партизаны дайнд өртсөн нутгуудаас тойрч гарахын тулд матартай усан бүсүүдийг гаталж байжээ. Перуд олны халдлагад өртөж, мөн ходоодны хүнд халдвар авчээ. Тухайн үед нутгийн нэг эмчийн гэр бүл түүнд тусалж, эдгэрэхэд нь дэмжлэг үзүүлсэн байна.
2006 онд Бушби Америкийн нэг аялагчтай хамт хөлдсөн Берингийн хоолойг гаталжээ. Замдаа цагаан баавгайтай тулгарч, нэг удаа мөсөн ус руу цөмөрч унан амь насаа алдах шахсан байна. Мөн бүх хэрэгслээ алдах дөхөж, эцэст нь задгай тэнгис рүү хөвөн одож байсан мөсөн дээрээс нисдэг тэргээр нүүлгэн шилжүүлжээ.
COVID-19 цар тахал ч аяллыг нь удаашруулсан байна. Үүнээс гадна геополитикийн хязгаарлалтаас болж Бушби Каспийн тэнгисийг сэлж гатлахад хүрчээ. Өөрийнх нь хэлснээр сайн сэлдэггүй ч аврах хантааз, усны хамгаалалтын хувцас хэрэглэн ихэвчлэн нуруугаараа хэвтэж, гараараа хөдөлсөөр 31 хоногийн дотор нөгөө эрэгт хүрсэн байна.
Хэдхэн долоо хоногийн өмнө тэр Ла-Маншийн хоолойг мөн сэлж гатлан, Дуврын ойролцоох Британийн эрэгт хүрчээ. Түүний хэлснээр, цаг агаар таатай байсан бөгөөд хоолойг гатлахад тохиромжтой гурван өдөр таарсан байна.
Хэдийгээр экспедиц 28 жил үргэлжилсэн ч Бушби бодитоор замд ойролцоогоор 15 жилийг өнгөрүүлжээ. Үлдсэн хугацааны ихэнхийг бичиг баримт бүрдүүлэх, зөвшөөрөл хүлээх болон янз бүрийн хязгаарлалтыг даван туулахад зарцуулсан байна. Завсарлагааны үеэр амьдрах зардал хямд тул Мексикт олонтаа суурьшдаг байжээ.
Тэр аялагчийн өдөр тутмын амьдрал гаднаас харагддаг шигээ сонирхол татам биш гэдгийг онцолсон байна.
“Би байнга л энгийн зүйлс хийдэг. Цоорсон дугуйгаа засна, хувцсаа хаана угаахаа хайна. Энэ бол миний амьдрал. Өдөр тутмын жижиг зүйлс, бороонд алхах, дуусашгүй олон километр. Гаднаас харагддаг шиг тийм сайхан биш” гэж тэр ярьжээ.
500 ам.доллараас эхэлсэн аялал ба танихгүй хүмүүсийн тус
Экспедицээ эхлэх үед Бушбид ердөө 500 ам.доллар байжээ. Ивээн тэтгэгчдийн дэмжлэг авч, ном хэвлүүлэх гэрээ байгуулахаас өмнө тэр хандивын мөнгөөр амьдарч, заримдаа замын хажуугаас олсон хүнсээр хүртэл хооллодог байсан байна.
Түүний хэлснээр, олон жилийн турш танихгүй хүмүүс түүнд удаа дараа тусалжээ. Өөрсдөө бараг юу ч үгүй байсан хүмүүс хүртэл хоноглох газар санал болгож, хоолоо хуваалцан, хүнд үед нь дэмждэг байв.
“Би хүн төрөлхтний хамгийн сайхан хүмүүсийг харсан. Энэ үнэхээр урам өгдөг. Хүмүүст итгэх итгэлийг минь улам бататгасан. Танихгүй хүмүүсийн сайхан сэтгэл энэ аяллыг боломжтой болгосон. Дэлхийн өнцөг булан бүрийн хүмүүсийн тусламжгүйгээр би үүнийг хийж чадахгүй байсан” гэж Бушби хэлжээ.
Гэхдээ олон жил гэрээсээ хол байсны төлөөс хувийн амьдралд нь ч нөлөөлсөн байна. Тэр эхнэрээсээ салсныхаа дараа аялалд гарсан бөгөөд хуучин эхнэр нь хүүгээ дагуулан Хойд Ирланд руу буцжээ.
Экспедицийн дүрмийнхээ улмаас Бушби гэр бүлийнхэнтэйгээ уулзахаар Их Британид буцаж очиж чаддаггүй байв. Тэд хааяа өөр улс оронд л уулздаг байжээ.
Энэ хугацаанд түүний хүү Адам өсөж, одоо 36 настай болсон байна. Бушби мөн 12 настай ач охинтой ч түүнтэйгээ одоог хүртэл нэг ч удаа уулзаагүй аж. Түүнчлэн ээжтэйгээ арван жилийн турш уулзаагүй байна.
“Гэр бүл хэзээд гэр бүл хэвээрээ. Гэхдээ хурцадмал байдал бий болж, хоорондын зай нэмэгддэг. Бие биеэсээ тийм холдчихоор бүр нэгнээ танихаа больдог” гэж тэр ярьжээ.
Экспедицийн үеэр Бушби Колумбын нэг эмэгтэйтэй долоон жил, мөн Япон эмэгтэйтэй гурван жил үерхсэн ч хоёр харилцаа нь хоёулаа салалтаар төгссөн байна.
Гэртээ ирсний дараа өөрийгөө дахин олох сорилт
Маршрутын сүүлийн хэдхэн километр үлдээд буй энэ үед Бушби энгийн амьдралдаа эргэн орохоос санаа зовж байгаагаа хүлээн зөвшөөрчээ. Тэр амьдралынхаа бараг хагасыг энэ экспедицэд зориулсан бөгөөд дараа нь юу хийхээ одоогоор мэдэхгүй байна.
“Миний байгаа бүх зүйл, өөрийнхөө тухай мэддэг бүх зүйл алга болно. Энэ л асуудал болно. Миний хэн болох тухай ойлголтын хямрал үүснэ. Учир нь Карл бол аялагч, амьдралынхаа хагасыг тэр чигээрээ аялагч байсан” гэж Бушби хэлжээ.
Түүний хэлснээр, аялал дууссаны дараа амьдралын утга учир, шинэ зорилгоо дахин олох шаардлагатай болно.
“Би өөрийгөө хэн бэ гэдгийг дахин ойлгох хэрэгтэй болно. Одоо утга учир нь юу вэ? Шинэ зорилгоо яаж олох вэ? Гэнэт бий болох тэр хоосон орон зайг юугаар дүүргэх вэ?” гэж тэр нэмж хэлсэн байна.
Бушбиг Их Британид буцаж ирэхэд ийм их анхаарал хандуулж байгаад өөрөө гайхаж байгаагаа хэлжээ. Замд нь хүмүүс таньж, жолооч нар дохио өгч дэмжлэг илэрхийлэн, зарим хүн хамт зургаа авахуулахаар зогсож байгаа аж.
“Заримдаа хүмүүс ингэтлээ баярлаж байхад нь яагаад гэдгийг би ойлгодоггүй. Миний хувьд жаахан сонин. Би зүгээр л алхаж яваа нэг хүн” гэж тэр хэлжээ.
11-р сарын 1-нд Бушбигийн аав, ах хоёр түүнтэй нэгдэж, хамтдаа Хамберын гүүрийг гаталсан байна. Төрөлх хотод нь хүү, ач охин нь тосож авах бөгөөд ээж Анжела нь 28 жилийн өмнө орхин гарсан, өссөн гэрийнх нь дэргэд түүнийг хүлээж байх аж.
Бүх бэрхшээлийг үл харгалзан Бушби шийдвэртээ харамсдаггүй байна. Томоохон аялал хийхийг хүсдэг хүмүүст тэр боломж бүрийг ашиглахыг зөвлөжээ.
“Боломж бүрийг ашигла. Та өөрийнхөө төсөөлж байгаагаас хамаагүй ихийг хийж чадна. Өөртөө жаахан ч гэсэн итгэхэд маш хол явж болно. Юу ч хийхгүй бол юу ч бүтээхгүй” гэж Бушби хэлжээ.
Эх сурвалж: AP
