Онцгой байдлын байгууллагын алба хаагчид иргэдийг идэвхтэй хөдөлгөөн, дасгал сургуулилтад уриалах өглөөний дасгалын арга хэмжээг Сүхбаатарын талбайд зохион байгуулж эхэлжээ. Энэхүү үйл ажиллагаа Монгол Улсын Ерөнхийлөгчийн санаачилсан “Эрүүл Монгол хүн” үндэсний хөдөлгөөний хүрээнд хэрэгжиж байгаа гэж мэдээлсэн байна.
Есдүгээр сарын 28-ны өглөө 07:20-08:00 цагийн хооронд Онцгой байдлын ерөнхий газар болон нийслэлийн анги, салбарын нийт 300 орчим алба хаагч төв талбайд дасгал хийжээ. Мөн Монголын Улаан загалмай нийгэмлэгийн сайн дурын идэвхтэн хүүхдүүд, сурагчид уг арга хэмжээнд оролцсон байна.
Дасгалыг 29, 30-нд мөн зохион байгуулна
Бүх нийтийн өглөөний дасгалыг Сүхбаатарын талбайд есдүгээр сарын 29, 30-ны өдрүүдэд 07:20-08:00 цагийн хооронд үргэлжлүүлэхээр төлөвлөжээ. Иргэд дасгал хөдөлгөөнд нэгдэж, өглөөг идэвхтэй эхлүүлэх боломжтой юм.
Онцгой байдлын байгууллага алба хаагчдынхаа эрүүл мэнд, бие бялдрын бэлтгэлийг дэмжих зорилгоор ажлын өдрийг 10 минутын дасгалаар эхлүүлэх дадлыг хэвшүүлээд байгаа аж.
“Идэвхтэй хөдөлгөөн өдөр тутмын дадал болох хэрэгтэй”
Онцгой байдлын ерөнхий газрын дарга, хошууч генерал Г.Ариунбуян дасгал хөдөлгөөнийг зөвхөн тамирчдын бэлтгэл бус, хүн бүрийн өдөр тутмын эрүүл амьдралын нэг хэсэг болгох нь чухал гэж онцолжээ.
Тэрбээр олон улсын судалгааг эш татан тогтмол дасгал хийдэг аврагч, гал сөнөөгчдийн гэмтэл авах эрсдэл 25-30 хувь, стрессийн түвшин 20-40 хувь, үе мөч болон нурууны гэмтлийн тохиолдол 15-25 хувиар бага байдаг гэж мэдээлсэн байна.
Онцгой байдлын байгууллага цаашид алба хаагчдын эрүүл мэндийн эрт илрүүлэг, урьдчилан сэргийлэх үзлэг болон нийтийн биеийн тамирын үйл ажиллагааг тогтмол үргэлжлүүлэхээр ажиллаж байгаа аж.
