Монголын болон дэлхийн олон үндэстний хоолны соёлыг нэг дороос танилцуулах зорилготой “UB Food Festival-2026” олон улсын хоолны өдөрлөг өнөөдрөөс эхэлж, дөрөвдүгээр сарын 26-ны өдрийг хүртэл Д.Сүхбаатарын талбайд үргэлжилнэ.
Олон улсын хоолны өдөрлөг 12 дахь жилдээ зохион байгуулагдаж байна
Энэ удаагийн фестивалиар иргэд, жуулчдад Монгол үндэсний хоолноос гадна Хятад, Япон, Солонгос, Тайланд, Энэтхэг, Гүрж, Итали зэрэг нийт 18 орны нэрийн хоол, төрөл бүрийн зууш, кофе, десерт амттаныг санал болгож байна. Арга хэмжээнд ресторан, хоол үйлдвэрлэлийн салбарын 30 гаруй аж ахуйн нэгж, байгууллага оролцож байгаа бөгөөд “UB Food Festival” ийнхүү 12 дахь жилдээ болж буйгаараа онцлог юм.
Фестивалийг жуулчны улирлыг угтан хүрээг нь тэлж зохион байгуулж байна
Олон улсын хоолны өдөрлөгийн нээлтийн үеэр нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин үг хэлсэн юм. Тэрбээр “Нийслэлийн Засаг даргын Тамгын газар, нийслэлийн Аялал жуулчлалын газраас Монголын Ресторан зоогийн газрын холбоо, Монголын Тогооч нарын холбоотой хамтран “UB food festival” арга хэмжээг зохион байгуулж байна. Энэхүү арга хэмжээг жуулчны улирлыг угтан зохион байгуулж буйгаараа онцлог бөгөөд Бүгд Найрамдах Азербайжан Улс, Бүгд Найрамдах Казахстан Улс, Оросын Холбооны Улсаас зочин тогооч нар хүрэлцэн ирж Казакстан, Кавказ, Словени болон Орос үндэсний хоолоор иргэд, жуулчдад үйлчилнэ. Өнгөрсөн жилийн фестивальтай харьцуулахад хүрээгээ тэлж, хоол үйлдвэрлэлийн салбарын 30 байгууллага 18 үндэстний нэрийн хоолоор иргэдэд үйлчилж байна. Аливаа үндэстний хоолны соёл нь тухайн орныхоо байгаль, цаг уур, газрын байршил, эрхлэх аж ахуйтай нарийн зохицсон байдаг. Монголчууд бидний хувьд ч эртнээс уламжлагдаж ирсэн хоол хүнс, цагаан идээ нь нүүдлийн мал аж ахуй, нүүдэлчдийн соёлын нэг илрэл болдог. Иймд уламжлалт хоол, хүнсээ сурталчилж, бусад олон үндэсний хоолны соёлыг иргэд, жуулчдад энэхүү фестивалиар дамжуулан таниулахыг зорьж байна. “UB food festival-2026” арга хэмжээ 10 хоног үргэлжилнэ. Үүний дараа Циркийн өдрүүд эхэлнэ” гэдгийг онцоллоо.
Зочин тогооч нар болон олон орны хоол нэг талбайд төвлөрчээ
Энэ жилийн өдөрлөг өмнөх оныхоосоо цар хүрээгээ тэлсэн бөгөөд гадаадын зочин тогооч нарын оролцоо нэмэгдсэнээрээ онцлог болж байна. Азербайжан, Казахстан, ОХУ-аас хүрэлцэн ирсэн тогооч нар өөрсдийн орны болон бүс нутгийн онцлог хоолнуудаар иргэд, жуулчдад үйлчилж байгаа нь фестивалийн агуулгыг илүү баяжуулж байна.
Ингэснээр зөвхөн амтат хоол идэхээс гадна олон орны ахуй, соёл, уламжлалыг хоолоор нь дамжуулан мэдрэх боломжийг энэхүү өдөрлөг бүрдүүлж байна.
Хоолноос гадна урлаг, шоу үзүүлбэрүүд фестивалийг чимж байна
“UB Food Festival-2026” зөвхөн хоол амтлах арга хэмжээ биш юм. Өдөрлөгийн хүрээнд шилдэг тогооч нарын тусгай үзүүлбэр, асар бүрийн онцлох хоолнуудын танилцуулга, амьд хөгжмийн тоглолт, урлагийн хөтөлбөр, мөн хоолны тэмцээн, уралдаануудыг зохион байгуулж байна.
Иймээс тус арга хэмжээ нь гэр бүл, найз нөхөд, жуулчдын хамт очиж амралтын өдрүүдийг өнгөрүүлэх соёл, аялал жуулчлал, хоол үйлдвэрлэлийг хослуулсан нээлттэй орчин болж байна.
Нийслэлийн төв талбайд хоолны соёлыг сурталчлах томоохон талбар бүрдэв
Фестивалийн гол зорилго нь Монголын уламжлалт хоол хүнсийг сурталчлахын зэрэгцээ дэлхийн олон орны хоолны соёлыг нэг дороос таниулахад чиглэж байна. Энэ нь нийслэлийн аялал жуулчлалыг дэмжихээс гадна хоол үйлдвэрлэлийн салбарын оролцогчдод бүтээгдэхүүн, үйлчилгээ, ур чадвараа олон нийтэд танилцуулах бодит боломж болж байна.
Ийнхүү “UB Food Festival-2026” нь Сүхбаатарын талбайг 10 хоногийн турш амт, үнэр, соёл, урлаг хосолсон томоохон баярын уур амьсгалтай орон зай болгон хувиргаж байна.
