УИХ-ын гишүүн П.Сайнзориг “хүний биед хөнгөн хохирол санаатай учруулсан” гэх үндэслэлээр яллагдагчаар татагдаж, хууль хяналтын байгууллагад шалгагдаж байна. Шалгалтын ажиллагааны хүрээнд түүнд Монгол Улсын хилээр гарахыг хязгаарлах таслан сэргийлэх арга хэмжээ аваад байгаа юм. Уг хэрэг явдал өнгөрсөн хоёрдугаар сарын 5-ны өдөр гарсан бөгөөд тэрбээр согтуурсан үедээ Тагнуулын ерөнхий газрын дарга асан Б.Хурцын хүү Х.Тайвантай маргалдаж, зодолдсон гэх хэрэгт холбогдоод байна.
Хэрэв шүүхээс П.Сайнзоригийг гэм буруутайд тооцвол Эрүүгийн хуулийн 11.6 дугаар зүйлд заасан дараах ял шийтгэлүүдийн аль нэгийг оноох хуулийн зохицуулалттай:
- 450-1350 нэгжтэй тэнцэх хэмжээний төгрөгөөр торгох;
- 240-720 цаг хүртэл хугацаагаар нийтэд тустай ажил хийлгэх;
- Нэгээс гурван сар хүртэлх хугацаагаар зорчих эрхийг хязгаарлах.
Гэвч энэхүү хуулийн заалт нь бодит амьдрал дээр хэр оновчтой байгаа талаар хуульч Б.Батхүү тэргүүтэй мэргэжилтнүүд удаа дараа шүүмжлэлтэй хандаж ирсэн. Түүний тайлбарласнаар, Эрүүгийн хуулийн 11.6 дахь заалт нь ахуйн хүрээний жижиг маргаан, согтууруулах ундаа хэрэглэсэн үед гардаг шүргэлцээн, барилцаж авах төдий зүйлд ч шууд эрүүгийн хэрэг үүсгэх нөхцөлийг бүрдүүлдэг аж. Статистик мэдээллээс үзэхэд Монгол Улсад жилд бүртгэгддэг 30 гаруй мянган гэмт хэргийн 25-30 хувийг зөвхөн хүний биед хөнгөн хохирол учруулах төрлийн хэрэг эзэлж байна.
Түүх сөхвөл, 2015 оноос өмнө ийм төрлийн маргааныг талууд эвлэрч, гомдлоо татсанаар хэргийг хаах боломжтой байсан бол одоо заавал шүүхээр орж шийдэгдэх хуулийн хатуу заалт мөрдөгдөж байна. Үүний улмаас ахуйн маргаанаас үүдэлтэй хэрэгт олон иргэн эрүүгийн ял шийтгэл хүлээж байгааг хуульчид онцолсоор ирсэн юм. Эрүүгийн хуулийн 11.6 дугаар зүйлийг амьдралд нийцүүлж, талууд эвлэрсэн тохиолдолд хэргийг зогсоох боломжийг эргэн сэргээх саналыг хууль сахиулагчид гаргаж байсан ч өнөөдрийг хүртэл бодит өөрчлөлт ороогүй байна. Харин хууль тогтоогч өөрөө ийм төрлийн хэрэгт холбогдсон нь энэхүү эрх зүйн зохицуулалтыг дахин нягталж, шинэчлэх бодит хөшүүрэг болно гэсэн хүлээлтийг нийгэмд төрүүлээд байна.
