Улс төрийн намууд шинэчлэгдэн батлагдсан “Улс төрийн намын тухай хууль”-ийн дагуу дүрмээ Улсын дээд шүүхэд бүртгүүлж, бүтцийн өөрчлөлтүүдээ эрчимтэй хийж байна. Энэхүү үйл явцын хүрээнд намууд дотооддоо бага, дунд, дээд шатны зохион байгуулалтаа шинэчилж буй бөгөөд үүнийг дагасан санал зөрөлдөөн, дотоод зөрчил ч хурцадсаар байгаа юм.
Тухайлбал, МАН өнгөрсөн оны аравдугаар сард Их хурлаараа Удирдах зөвлөлөө шинэчлэн баталж, улмаар 2026 оны хоёрдугаар сарын 27-нд Бага хурлаа зарлан дотоод дүрмээ хэлэлцсэн билээ. Үүнтэй зэрэгцэн Ардчилсан нам Үндэсний бодлогын хорооны гишүүдийн сонгуулиа зарласан нь намын гишүүдийн дунд багагүй “зодоон” үүсгээд байна. Энэхүү сунгааны үеэр АН-ын дарга асан С.Эрдэнийн гэргий Н.Нинжбадгар УИХ-ын гишүүн Д.Энхтуяад хандан олон нийтийн сүлжээгээр дамжуулж маш хатуу байр суурь илэрхийлсэн нь олны анхаарлыг татлаа.
Н.Нинжбадгар өөрийн мэдэгдэлдээ: “Д.Энхтуяа гишүүнээ, хүний муу болж үйлийн мууг хийхээ болиоч. Хэний мориор газар дөхсөнөө санаарай. Өгсөхдөө муу үйлээр явсан бол буцаж ирэх зам чамд байхгүй” хэмээн бичжээ. УИХ-ын гишүүн Д.Энхтуяагийн хувьд С.Эрдэнийн квотоор парламентад хөл тавьсан гэгддэг бөгөөд түүний улс төрийн замналын зарим баримтуудыг дурдвал:
- 2024 оны УИХ-ын сонгуулиар Ардчилсан намын жагсаалтын 8 дугаарт бичигдсэн.
- С.Эрдэнэ даргын дэмжлэгтэй квотоор жагсаалтад багтаж, парламентад сонгогдсон.
Ийнхүү намын дотоод шинэчлэлийн үйл явц эрхэм гишүүнийг өнгөрсөн хугацаанд дэмжиж ирсэн талынхантай нь зөрчилдөхөд хүргэсэн бололтой. Н.Нинжбадгарын зүгээс гаргасан эл шүүмжлэл нь улс төрийн хүрээнд “ач тусаа мартахгүй байх” ёс зүйн асуудлыг хөндөхөд хүргээд байна.
