Үйлдвэрийн аргаар гүн боловсруулсан, чихэрлэг, хэт тослог хүнс, согтууруулах ундаа болон улаан мах зэрэг нь бие махбодод үрэвсэл үүсгэх буюу үрэвслийг даамжруулах үйлчилгээ үзүүлдэг тул эдгээрээс татгалзах хэрэгтэй.
Бидний өдөр тутамдаа хэрэглэдэг зарим түгээмэл ундаа, хоол нь үрэвсэл үүсгэж, гэдэсний үйл ажиллагааг алдагдуулан, бие махбодын хамгаалалтын системийг сулруулдаг болохыг Eat This мэдээллээ.
Мэргэжилтнүүдийн хязгаарлахыг зөвлөж буй хүнснүүд:
- Хийжүүлсэн ундаа: Чихэрлэг хийжүүлсэн ундаа нь үрэвслийн процессыг идэвхжүүлдэг. Судалгаагаар ийм ундаа тогтмол хэрэглэдэг хүмүүсийн цусанд үрэвслийн маркер болох С-реактив уургийн түвшин өндөр байдаг нь тогтоогджээ. Мөн шингэн хэлбэрээр их хэмжээний илчлэг авах нь үрэвслийг улам даамжруулдаг.
- Түргэн хоол (Фастфуд): Шарсан хуурсан хүнс, цагаан гурил болон чихрийн нэгдэл нь дархлааны үйл ажиллагаанд сөргөөр нөлөөлдөг өндөр илчлэгтэй хослолыг үүсгэдэг.
- Согтууруулах ундаа: Организм спиртийг хорт бодис гэж хүлээн авч, түүнийг саармагжуулахын тулд бүх нөөцөө зарцуулдаг тул дархлаа сулардаг. Түүнчлэн согтууруулах ундаа нь нойрны чанарыг алдагдуулдаг бөгөөд дутуу нойртой байх нь вирус, ханиадтай тэмцэх чадварыг бууруулдаг байна.
- Шарсан мах: Махыг хэт их хайрч, шарах үед гликозилжилтийн эцсийн бүтээгдэхүүн (AGE) үүсдэг бөгөөд энэ нь исэлдүүлэх стрессийг нэмэгдүүлдэг. Энэ нь дархлааг сулруулаад зогсохгүй бүдүүн гэдэсний хорт хавдар тусах эрсдэлийг нэмэгдүүлдэг.
Дангаараа эрүүл мэндийг бүрэн засах “шидтэй” ганц хүнс гэж байдаггүй гэдгийг санаарай. Хооллолт нь тэнцвэртэй, олон төрөл байх ёстой. Хүнсний шим тэжээлийг дээд зэргээр хадгалахын тулд бүтээгдэхүүнийг ууранд жигнэх, гриллдэх эсвэл жигнэж болгохыг зөвлөж байна.
