Уолт Диснейн “Дахин гэрлэсэн хатан хаан” цуврал нээлтээ хийснээс хойш гуравхан хоногийн дотор дэлхийн 33 улс, бүс нутагт хамгийн өндөр үзэлттэй цуврал болжээ. Түүнчлэн тус бүтээл Disney-ийн дэлхийн үзэлтийн жагсаалтад нэг өдрийн дотор долоодугаар байраас хоёрдугаар байр руу дэвшсэн байна.
Америкийн Deadline хэвлэлийн мэдээлснээр, “Дахин гэрлэсэн хатан хаан” нь Уолт Диснейн түүхэнд нээлтийн үеэрээ хамгийн олон үзэгч татсан цувралаар нэрлэгдэж байгаа аж.
Хайр дурлал, хааны ордны амьдралыг өгүүлэх цуврал
“Дахин гэрлэсэн хатан хаан” цувралын үйл явдал нөхрийнхөө хайрыг алдсан хатан хаан Навьегийн амьдралыг тойрон өрнөдөг. Тэрбээр гэр бүлийн харилцаа нь өөрчлөгдсөний дараа өөр улсын ханхүүтэй дахин гэрлэж буй түүхийг уг бүтээлд өгүүлжээ. Цувралын гол дүрүүдийг Өмнөд Солонгосын жүжигчин Шин Мин А, Жү Жи Хүн, И Жон Сок, И Сэ Ён нар бүтээсэн байна.
Нийт 10 ангитай тус цуврал богино хугацаанд олон улсын үзэгчдийн анхаарлыг татаж, Disney-ийн дэлхийн үзэлтийн жагсаалтад хоёрдугаар байрт бичигдээд байна. Бүтээлийн төгсгөлийн буюу арав дахь ангийг 2026 оны арваннэгдүгээр сарын 25-нд үзэгчдэд хүргэхээр товложээ.
Ийнхүү “Дахин гэрлэсэн хатан хаан” цуврал нээлтийн эхний гурван өдрийн үзэлтээрээ 33 улс, бүс нутагт тэргүүлж, Deadline-ийн мэдээлснээр Disney-ийн түүхэн дэх хамгийн өндөр үзэлттэй нээлтийн амжилтыг тогтоосон байна.
Эх сурвалж: Deadline
