Британийн дуучин Olivia Dean Apple Music-ийн 2026 оны шилдэг уран бүтээлчээр тодорчээ. Ингэснээр тэр энэхүү шагналыг хүртсэн Их Британийн анхны уран бүтээлч болсон байна.
Түүний карьерын хамгийн том амжилтын нэг нь 2025 оны сүүлээр гарсан “The Art of Loving” цомог байв. Цомгийн хамгийн алдартай дуунуудын нэг “Man I Need” 2025 оны 8-р сарын 29-нөөс хойш Apple Music-ийн Daily Top 100 жагсаалтад өдөр бүр багтсаар иржээ.
Өнгөрсөн нэг жилийн хугацаанд Dean “Шилдэг шинэ уран бүтээлч” төрөлд “Грэмми” хүртэж, мөн BRIT Awards-аас дөрвөн шагнал, түүний дотор оны шилдэг уран бүтээлчийн шагнал авсан байна.
Тэр мөн дэлхийг тойрсон аялан тоглолтоо бүх тасалбар нь борлогдсон байдлаар амжилттай хийжээ.
2025 оны намар дуучин Нью-Йоркийн Madison Square Garden-д Sabrina Carpenter-ийн тоглолтын өмнө тайзнаа гарч байсан бол жил хүрэхгүй хугацааны дараа тус ордонд өөрийн дөрвөн тоглолтыг хийсэн байна. Үүний дараа Лондонгийн O2 Arena-д зургаан удаа тоглож, бүх тасалбараа борлуулжээ.
Apple Music түүний уран бүтээлийн нөлөөг онцолжээ
Apple Music-ийн мэдээлснээр, Dean-ийн нэр хүнд өссөн нь хайр, нөхөрлөл, харилцааны тухай илэн далангүй дуунуудтай нь холбоотой аж.
Түүний хөгжимд 1960-аад оны соул болон поп хөгжмийн элементүүд шингэсэн бөгөөд уран бүтээлд нь Sade, Prince, Lauryn Hill нар нөлөөлсөн гэж үздэг.
“Би хөгжим бүтээх дуртай. Энэ бол дэлхий дээрх хамгийн сайхан зүйл. Apple-аас оны шилдэг уран бүтээлч хэмээн нэрлэгдэх нь үнэхээр гайхалтай мэдрэмж. Уран бүтээлийг чинь нөлөөтэй гэж үнэлэх нь маш сайхан санагдаж байна” гэж Dean шагналынхаа талаар хэлжээ.
