Баянзүрх дүүргийн Улиастай орчимд баавгай айлын гэрт орж, нэг хүний аминд хүрч, нэг иргэнийг хүнд шархдуулсан хэрэг гарсны дараа холбогдох байгууллагууд нөхцөл байдлын талаар мэдээлэл өглөө. Гэмтсэн иргэн Гэмтэл согог судлалын үндэсний төвд эмчлүүлж байна.
Мэдээллийг дараах албан тушаалтнууд хийжээ.
- БОУАӨЯ-ны Байгалийн нөөцийн бодлого, зохистой ашиглалтын газрын дарга Т.Балжинням
- Нийслэлийн Онцгой байдлын газрын Эрсдэлийн удирдлагын хэлтсийн дарга, дэд хурандаа Ж.Хаш-Эрдэнэ
- Нийслэлийн Байгаль орчны газрын дарга Н.Мөнхбаяр
2026 онд баавгайн 28 дуудлага бүртгэгджээ
Албаныхны мэдээлснээр, баавгай үзэгдсэн тухай дуудлага 2018 онд хоёр, 2019 онд нэг удаа бүртгэгдсэн бөгөөд түүнээс хойш 2026 он хүртэл ийм дуудлага гараагүй байна.
Харин 2026 он гарснаас хойш нийт 28 дуудлага бүртгэгдсэнээс 24 нь бодит тохиолдол байжээ.
БОУАӨЯ цагдаагийн байгууллагатай хамтран аравдугаар сарын 7-ноос эхлэн ганцаараа явж байгаа бамбарууш болон төлөө дагуулсан эм баавгайгаас бусад тохиолдолд аюулгүй болгох ажиллагаа эхлүүлсэн гэж мэдээлсэн байна.
Баавгайн эсрэг арга хэмжээнд 1.8 тэрбум төгрөг зарцуулна
Засгийн газрын тогтоолоор баавгайтай холбоотой эрсдэлийг бууруулах арга хэмжээнд 1.8 тэрбум төгрөг зарцуулахаар болжээ. Уг хөрөнгийг дараах зориулалтаар ашиглахаар төлөвлөсөн байна.
- Булчин сулруулах, унтуулгатай буу авах
- Баавгай барих тор бэлтгэх
- Орон нутгийн тусгай хамгаалалттай газруудын тээврийн хэрэгслийн шатахуунд зарцуулах
- Баавгай давтамжтай үзэгдсэн бүсэд анхааруулга, зөвлөмж хүргэх
Мөн найман аймагт баавгай агнах зөвшөөрөл олгосон бөгөөд үүний дагуу зургаан баавгай агнаад байгаа аж.
Хоол тэжээлийн хомсдол нөлөөлж байж болзошгүй
Албаныхан баавгай суурьшлын бүсэд ойртож байгаа шалтгааныг судалж байгаа бөгөөд Хэнтий аймагт агнасан нэг баавгайд задлан шинжилгээ хийхэд ходоодонд нь хоол тэжээл бараг байгаагүй гэж мэдээлжээ.
Үүнтэй холбоотойгоор баавгай хоол тэжээлийн хомсдлоос шалтгаалан суурьшлын бүс рүү орж ирж байж болзошгүй гэсэн таамгийг дэвшүүлсэн байна. Энэ нь одоогоор албан ёсоор тогтоогдсон эцсийн дүгнэлт биш юм.
Самар, мод, жимстэй холбоотой хяналтыг чангатгана
Холбогдох байгууллагууд ойн бүс дэх дараах үйл ажиллагаанд хяналт тавьж, заримыг нь хориглохоор ажиллаж байгаагаа мэдээлжээ.
- Хууль бусаар самар түүх
- Хууль бус мод бэлтгэл
- Жимс түүхээр уул, ойд зорчих
Эдгээр арга хэмжээ нь баавгайн идэш тэжээлийн орчинд хүний нөлөөллийг бууруулах, хүн ба зэрлэг амьтны зөрчлийг багасгахад чиглэж байгаа аж.
