Монголын уламжлалт хүндэтгэлийн зоог болох хорхгийг дэлхийд сурталчлан таниулах зорилгоор 1,000 тогооч нэгэн зэрэг 1,000 тогоо хорхог хийж, “Guinness World Records” буюу Гиннесийн дээд амжилтад бүртгүүлэх арга хэмжээг Налайх дүүргийн Тайж хайрханд амжилттай зохион байгууллаа. Тус арга хэмжээ нь наймдугаар сарын 21-нээс 23-ны өдрүүдэд болсон “Нүүдэлчин” дэлхийн соёлын фестивалийн хүрээнд явагджээ.
Монголын тогооч нарын холбооноос хорхгийг Гиннесийн дээд амжилтад бүртгүүлэх санаачилгыг анх 10 орчим жилийн өмнө гаргаж байсан бөгөөд энэ жил ийнхүү бодитоор хэрэгжүүлэв.
Арга хэмжээний онцлох баримтууд:
- Амжилтын ангилал: “Хамгийн олон хүн нэгэн зэрэг хорхог бэлтгэсэн” төрлөөр дэлхийн дээд амжилт тогтоосон,
- Шүүгчдийн хяналт: “Guinness World Records”-ийн олон улсын шүүгчид газар дээр нь ажиллаж, рекордын шаардлага, стандартыг шалгасан,
- Оролцогчид: 1,000 тогооч нэгэн цагт нэг дор 1,000 тогоонд хорхог бэлтгэж оролцсон.
Соёлын ач холбогдол ба аялал жуулчлал
Хорхог нь хонь, ямааны махыг галд улайсгасан чулууны тусламжтайгаар битүү жигнэж болгодог Монголын уламжлалт зоог бөгөөд хүндэт зочноо дайлдаг үндэсний хоолны соёлын чухал хэсэг юм.
Энэхүү арга хэмжээгээр дамжуулан Монголын үндэсний хоол, нүүдэлчин ахуй, уламжлалт хоол хүнсний соёлыг олон улсад сурталчлах, аялал жуулчлалын бие даасан бүтээгдэхүүн болгон хөгжүүлэх чухал ач холбогдолтой хэмээн зохион байгуулагчид онцоллоо.
