BTS хамтлагийн гишүүн Жонгүг болон чинээлэг иргэдийг онилон олон сая ам.доллар завшихыг оролдсон олон улсын хакерын бүлгийн толгойлогчид Өмнөд Солонгосын шүүхээс 20 жилийн хорих ял оноолоо. Сөүл хотын Төв дүүргийн шүүх БНХАУ-ын иргэн “А”-г залилан болон Мэдээллийн сүлжээний тухай хууль зөрчсөн хэрэгт буруутай гэж үзэн анхан шатны шүүхээр шийдвэрлэсэн байна.
Хакерын бүлгийн үйлдэл ба хохирлын хэмжээ
Уг бүлэг нь хөрөнгө чинээтэй хүмүүсийг зориуд сонгон тэдний хувийн мэдээллийг хууль бусаар цуглуулж, санхүүгийн данс руу нь нэвтэрдэг байжээ.
Тэдний хууль бус ажиллагааны онцлох фактууд:
- Тайланд зэрэг орнуудаас хакерын ажиллагааг зохион байгуулж, 2023 оны наймдугаар сараас 2025 оны нэгдүгээр сар хүртэл хохирогчдын мэдээллийг цуглуулсан,
- Хохирогчдын нэр дээр зөвшөөрөлгүй гар утасны дугаар нээн, санхүүгийн дансанд нь нэвтрэх замаар нийт 38 тэрбум орчим вон завшсан,
- Жонгүгийг цэргийн албанд байх хугацаанд брокерын дансанд нь хууль бусаар нэвтэрсэн.
Жонгүгийн хувьцаанд халдсан оролдлого
Сэжигтэн “А” нь Жонгүгийн хувийн мэдээллийг ашиглан түүний данснаас 8.4 тэрбум вон буюу 6 орчим сая ам.долларын үнэ бүхий “Hybe” компанийн хувьцааг шилжүүлэн авахаар оролдсон байна. Гэвч Өмнөд Солонгосын хууль сахиулах байгууллагууд болон санхүүгийн байгууллагаас гүйлгээг цаг алдалгүй царцааж чадсан тул Жонгүг бодит санхүүгийн хохирол амсаагүй өнгөрчээ.
