Их жанжин Д.Сүхбаатарын нэрэмжит Үндэсний батлан хамгаалахын их сургууль түүхт 105 жилийн ойгоороо Монгол Улсын Ерөнхийлөгчийн зарлигаар “Монгол Улсын Баатар” цол хүртлээ.
Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх тус сургуулийн хамт олонд Монгол Улсын Баатар цолны Алтан таван хошуу болон Сүхбаатарын одонг гардуулсан байна.
1921 оноос цэргийн боловсон хүчин бэлтгэж иржээ
Үндэсний батлан хамгаалахын их сургууль 1921 онд Жанжин Д.Сүхбаатарын санаачилгаар үндэсний цэргийн боловсон хүчнийг дотооддоо бэлтгэх зорилгоор байгуулагдсан түүхтэй. Өнгөрсөн 105 жилийн хугацаанд тус сургууль Монгол Улсын тусгаар тогтнол, бүрэн эрхт байдал, үндэсний аюулгүй байдлыг хамгаалах үйл хэрэгт оролцох үе үеийн цэргийн дарга, офицер, ахлагч, төр, цэргийн зүтгэлтнүүдийг бэлтгэн гаргажээ.
ҮБХИС-ийн төгсөгчид эх орны тусгаар тогтнол, бүрэн эрхийг хамгаалах дайн байлдаан, энхийн үйлс болон НҮБ-ын энхийг дэмжих ажиллагаанд оролцож ирсэн байна.
Тус сургуулийн төгсөгчдийн эгнээнээс олон арван Монгол Улсын баатар төрөн гарчээ.
Шинэ чиглэлийн сургалт, судалгаагаа өргөжүүлж байна
Өнөөдөр Үндэсний батлан хамгаалахын их сургууль офицер, ахлагч бэлтгэхээс гадна кибер аюулгүй байдал, хиймэл оюун, шинжлэх ухаан, технологи, инноваци, нисгэгчгүй нисэх төхөөрөмжийн чиглэлээр сургалт, судалгаагаа өргөжүүлж байна.
Ингэснээр орчин үеийн Зэвсэгт хүчний хэрэгцээ шаардлагад нийцсэн мэргэжилтэн бэлтгэх чиглэлд үйл ажиллагаагаа хөгжүүлж байгаа юм.
