Олон улсын хэмжээний спортын том баяр болох “Улаанбаатар марафон 2026” гүйлтийн тэмцээн энэ бямба гарагт буюу тавдугаар сарын 23-ны өдөр зохион байгуулагдах гэж байна. Үүнтэй холбогдуулан тухайн өдрийн өглөөний 06:00 цагаас эхлэн марафон болох замуудыг хэсэгчлэн хаах бөгөөд улмаар 07:00 цагаас 19:00 цаг хүртэл шар зураасаар тэмдэглэгдсэн гол замуудыг бүрмөсөн хаахаар шийдвэрлэжээ. Иймд иргэдийг замын хөдөлгөөнөө урьдчилан төлөвлөж, зохицуулж оролцохыг уриалж байна.
Энэ хугацаанд хаагдсан замын хөдөлгөөнд зөвхөн дараах тусгай чиг үүргийн автомашинууд л нэвтрэх эрхтэй ажиллана:
- Түргэн тусламжийн автомашин;
- Цагдаагийн албаны унаа;
- Онцгой байдлын газрын тээврийн хэрэгсэл.
Цахилгаан тээврийн хэрэгслүүдийг хаалттай бүсэд нэвтрүүлэхгүй
Гүйгчид болон явган зорчигчдын аюулгүй байдлыг хангах, болзошгүй эрсдэлээс сэргийлэх үүднээс хаагдсан бүсэд цахилгаан дугуй, скүүтер, суррон болон мопед зэргийг хөдөлгөөнд оролцуулахыг бүрмөсөн хориглосон байна. Энэхүү шийдвэрийг нийслэлд түрээсийн үйл ажиллагаа эрхэлж буй долоон аж ахуйн нэгжид албан ёсоор мэдэгдсэн бөгөөд тухайн өдөр түрээсийн хэрэгслүүд ажиллахгүй. Хэрэв иргэд хувийн цахилгаан дугуй, сурронтойгоор хаалттай бүс рүү нэвтрэхийг оролдвол цагдаагийн алба хаагчид шаардлага тавьж, нэвтрүүлэхгүй ажиллах аж.
Анхааруулах баримт: Өнгөрсөн жилийн Улаанбаатар марафоны үеэр хаалттай замаар цахилгаан мопед, суррон, цахилгаан дугуй унаж хөдөлгөөнд оролцсоны улмаас 12 хүүхэд мөргүүлж, хүнд, хөнгөн хэлбэрээр гэмтсэн харамсалтай тохиолдол бүртгэгджээ. Иймд иргэдийг энэ жил сонор сэрэмжтэй байж, тэмцээнд оролцож буй тамирчдын аюулгүй байдлыг хүндэтгэхийг цагдаагийн байгууллагаас онцгойлон санууллаа.
