Засгийн газрын ээлжит хуралдаанаар “Эрдэнэс Монгол” ХХК-ийн харьяа 10 төрийн өмчит компанийг (ТӨК) татан буулгах шийдвэр гаргалаа. Тус шийдвэрийн талаар “Эрдэнэс Монгол” нэгдлийн гүйцэтгэх захирал Б.Даваадалай албан ёсны мэдээлэл өглөө.
Б.Даваадалай хэлэхдээ: ““Эрдэнэс Монгол” нэгдлийн хүрээнд томоохон шинэчлэлийг эхлүүлж байна. Манай нэгдэл цаашид засаглалаа хараат бус байлгах, цэвэр бизнесийн зарчмаар ажиллах бөгөөд уул уурхайн компаниудын өдөр тутмын үйл ажиллагаанд оролцохгүй. Илүү хөрөнгө удирдах, олон улсын зах зээлээс хөрөнгө босгох чиглэл рүү үйл ажиллагаагаа төвлөрүүлнэ” хэмээн онцлов.
Засаглалын шинэчлэл ба Баялгийн сангийн үүрэг
Үндэсний Баялгийн сангийн тухай хуульд “Эрдэнэс Монгол” ХХК-ийг Хуримтлалын санд орлого төвлөрүүлэгч байхаар заасан байдаг. Тус компани нь стратегийн ач холбогдол бүхий ашигт малтмалын ордын тусгай зөвшөөрөл эзэмшигчдийн толгой компани бөгөөд ногдол ашгийн тодорхой хэсгийг ирээдүйд үнэ цэн бий болгох төсөл хөтөлбөрүүдэд оруулж, байгалийн баялгийн орлогыг арвижуулах үндсэн зорилготой.
ТӨК-ийн шинэчлэлийн хүрээнд Засгийн газраас “Эрдэнэс Монгол” нэгдэлд буй үр ашиггүй, чиг үүрэг нь давхардсан 10 компанийг татан буулгах үүрэг даалгавар өгсөн юм. Ингэхдээ томоохон олборлолт эрхэлдэг аж ахуйн нэгжүүдийн бүтээмжийг сайжруулах, орон тоог цомхон болгох, нэн ялангуяа удирдах албан тушаалтнуудын буюу дарга нарын орон тоог эрс бууруулах чиглэлийг баримталж байна.
Зардал таналт ба хэмнэлтийн төлөвлөгөө
Бүтцийн шинэчлэлийг эхлүүлснээр дараах үр дүнгүүд гарна гэж тооцож байна. Үүнд:
- 260 орчим орон тоог оновчтой болгож цомхотгоно.
- Захиргааны зардлыг 10 хувиар бууруулна.
- Түрээсийн зардлыг 30 хувиар танана.
- Ингэснээр нийт 67 тэрбум төгрөгийн бодит хэмнэлт хийгдэнэ.
Дээрх 10 ТӨК-ийг 2026 оны зургаадугаар сарын 15-ны дотор багтаан татан буулгахаар ажиллаж байна. Эдгээр компаниуд бүгд Засгийн газрын тогтоолоор байгуулагдсан тул холбогдох тогтоолуудыг хүчингүй болгох замаар татан буулгах үйл ажиллагаа хуулийн дагуу явагдах аж.
“Шилэн барилга”-аас уурхай руу
Төрийн өмчит компаниуд хотын төвд өндөр үнэтэй, шилэн барилгуудад байрлаж, их хэмжээний түрээс төлдөг байдлыг бүрмөсөн зогсоохоор боллоо. Цаашид сул орон байр, өөрийн эзэмшлийн хөрөнгүүдээ ашиглаж, түрээсийн төлбөрийг эрс бууруулах юм байна.
Мөн хотод төлөөлөгчийн газартай уурхайнуудыг хотод байрлах шаардлагагүй гэж үзэж, шууд уурхай дээрээ очиж ажиллах зарчмыг Засгийн газраас гаргажээ.
“Хувийн хэвшлийн хийж чадаж байгаа ажилд төр өрсөлдөх шаардлагагүй. Цаашид “Чингис хаан”, “Баялгийн сан” корпорацын бүтцээр олон улсын зах зээл дээр гарч, ойрын хугацаанд тодорхой ашигтай ажиллаж байгаа компаниудынхаа хувьцааг хөрөнгө оруулагчдад санал болгох, харин ашиггүй ажиллаж байгаа компаниудыг хувьчлах ажил хийгдэнэ” хэмээн Б.Даваадалай мэдэгдэв.
Хуримтлалын сангийн үндсэн хэрэгжилт 2030 оноос эхлэх бөгөөд одоогоор “E-Mongolia” системд иргэн бүрд 500 мянган төгрөгийн хуримтлал бүртгэгдээд байгаа юм. Үүнийг энэ оны эцэс гэхэд 1 сая төгрөгт, цаашлаад 2030 он гэхэд 2-3 сая төгрөгт хүргэх зорилт тавин ажиллаж байна.
