Италийн Апули мужийн нэгэн оршин суугч эмэгтэй 1 сая еврогийн хожлын тасалбараа андууран хог руу хаясныг хог цуглуулагчдын тусламжтайгаар эргүүлэн авч чадсан тухай The Guardian мэдээллээ.
Эмэгтэй шууд шалгадаг лотерейд оролцоод, хожсон эсэхээ нутгийнхаа дэлгүүрт шалгуулжээ. Гэвч тус дэлгүүрийн төхөөрөмж тасалбарыг “шууд олгох боломжгүй” гэж заасан байна. Учир нь жижиг дэлгүүрүүд зөвхөн бага хэмжээний хожлыг бэлнээр өгдөг журамтай аж. Харин эмэгтэй үүнийг буруу ойлгон, юу ч хожоогүй хэмээн бодож, тасалбараа хогийн саванд хаяжээ.
Тэрээр ойр дотны хүнийхээ дурсгалд зориулж үргэлж нэг ижил тоонуудыг сонгон тоглодог байж. Гэртээ ирэхэд нь гэр бүлийнхэн нь түүний дуртай тоонууд джекпот хожсоныг дуулгажээ. Сандарсан эмэгтэй дэлгүүр рүү буцсан боловч хогийн савыг аль хэдийн хог ачигч машин авчихсан байв. Ингээд тэрээр хог хаягдлын SANB компанийн зохицуулагч Роберто Никола Тосканотой холбогдсон байна. Ажилтнууд хог ачсан машины маршрутыг тусгайлан замаас нь зогсоожээ.
Тусгай баг хог ачигч машин доторх хаягдлыг нэг хоног гаруй хугацаанд нэг бүрчлэн шүүсний эцэст хэд хэдэн баримт дундаас өнөөх супер хожлын тасалбарыг олж, эзэнд нь хүлээлгэн өгсөн байна. Харин азтай эмэгтэй хайлтын багийн гаргасан бүх зардлыг бүрэн төлөх үүрэг хүлээжээ.
