Ормузын хоолойн усан замын тээвэрлэлт хязгаарлагдмал байгаа нь, хэрэв дэлхийн улс орнуудын Засгийн газрууд яаралтай арга хэмжээ авахгүй бол ирэх зургаан сарын дотор дэлхий даяар хүнсний хямрал дэгдээх эрсдэлтэйг НҮБ-ын Хүнс, хөдөө аж ахуйн байгууллага анхаарууллаа. Энэ тухай “Politico” сонин мэдээлэв.
ФАО-оос тэмдэглэснээр, бордоо, импорт, санхүүжилт болон тариалах үр тарианы сонголтын талаар тариаланчид болон Засгийн газруудын яг одоо гаргаж буй шийдвэрүүд нь энэ оны (2026 он) сүүлч эсвэл 2027 оны эхээр хүнсний бүтээгдэхүүний үнэ хэр зэрэг огцом өсөхийг тодорхойлох аж.
Хямрал хэрхэн шат дараатайгаар нөлөөлөх вэ?
Ойрхи Дорнодын мөргөлдөөнтэй холбоотойгоор Ормузын хоолойгоор хөлөг онгоц нэвтрэхэд хүндрэл үүссэн, мөн эрчим хүчний үнэ өндөр байгаа зэргээс шалтгаалан дөрөвдүгээр сард хүнсний бүтээгдэхүүний үнийн индекс сүүлийн гурван сар дараалан өслөө. ФАО-ын мэдэгдсэнээр, үүний сөрөг үр дагавар дараах дөрвөн үе шаттайгаар илрэх гэнэ:
- Нэгдүгээр шат: Эрчим хүчний үнэ огцом өснө.
- Хоёрдугаар шат: Шатахууныг дагаад бордоо болон үр тарианы үнэ нэмэгдэнэ.
- Гуравдугаар шат: Хөдөө аж ахуйн орнуудад ургац хураалтын хэмжээ буурна.
- Дөрөвдүгээр шат: Дэлхий нийтээрээ эцсийн хэрэглэгчдэд шууд тусах хүнсний инфляцитай нүүр тулна.
НҮБ-ын Хүнсний байгууллагаас улс орнуудад хандан Ормузын хоолойн асуудлыг шийдвэрлэх, хямралтай бүс нутгийг тойрсон тээврийн өөр хувилбаруудыг хайх, мөн экспортын хязгаарлалтаас зайсхийж, хүнсний бүтээгдэхүүний урсгалыг аливаа хориг саадаас хамгаалахыг уриаллаа.
Европт эмийн хомсдол үүсэх эрсдэл
Тавдугаар сарын 15-ны өдрийн “La Tribune” сонинд мэдээлснээр, Ираны эргэн тойрон дахь нөхцөл байдал хурцадсаны улмаас Ормузын хоолой хаагдвал Европт эмийн бэлдмэлийн хомсдол үүсэж болзошгүй байна. Тус хэвлэлийн мэдээлснээр, Европын эмийн үйлдвэрлэлийн түүхий эдийн хангамжийн 80 хувь нь Хятад, Энэтхэг улсаас хамааралтай байдаг ажээ.
