Нийслэлийн хүнсний үнийн өсөлт: Үхрийн махны үнэ 36 мянган төгрөгт дөхлөө

Монголчуудын хувьд үнийн тасралтгүй өсөлт нь амьжиргаанд тулгарч буй хамгийн том сорилт болоод байна. Инфляцын түвшин өнгөрсөн сарын байдлаар 10.1 хувьд хүрч, хоёр орон тоо руу шилжсэн нь өргөн хэрэглээний бараа бүтээгдэхүүний үнэ “гаарч” байгаагийн гол шалтгаан юм. Статистик мэдээллээс харахад мах, гурил, тэр ч байтугай хүнсний ногооны үнэ өдөр ирэх тусам нэмэгдэж байна.

Тавдугаар сарын 11-ний өдрийн статистик мэдээгээр Улаанбаатар хотын гол нэрийн барааны үнэ өнгөрсөн сартай харьцуулахад 3.8 хувиар өсжээ. Энэ нь нийслэлчүүдийн хэрэглэж буй хүнсний өртөг долоо хоног бүр 0.4 хувиар нэмэгдэж байгааг харуулж буй хэрэг юм. Гэтэл иргэдийн орлого, тэтгэвэр тэтгэмж энэхүү үнийн хөөрөгдлийг гүйцэж чадахгүй байна. Хамгийн сүүлд 2025 оны дөрөвдүгээр сард хөдөлмөрийн хөлсний доод хэмжээг 792 мянган төгрөг болгож өөрчилснөөс хойш дорвитой зохицуулалт хийгдээгүй байна.

Мах болон хүнсний бүтээгдэхүүний үнийн харьцуулалт:

Үндэсний статистикийн хорооны мэдээллээр зарим гол нэрийн бүтээгдэхүүний үнэ дараах байдалтай байна:

• Үхрийн цул мах: Нэг килограмм нь 35,848 төгрөгт хүрсэн нь өнгөрсөн жилийн мөн үеэс 53.2 хувиар өссөн үзүүлэлт юм. Энэхүү үнэ нь захын дундаж ханш бөгөөд сүлжээ дэлгүүрүүдэд үүнээс ч өндөр байна.
• Хонины ястай мах: Кг нь 26 мянган төгрөг давж, өмнөх сараас 6.2 хувиар нэмэгдэв.
• Сонгино: Нэг долоо хоногийн дотор 1.3 хувиар өсөж, 4,445 төгрөг болсноор хамгийн эрчимтэй үнэ нь өсөж буй ногоогоор нэрлэгдлээ.

Бусад өргөн хэрэглээний барааны дундаж ханшийг хүснэгтээр харуулбал:

Нийслэлийн иргэд долоо хоног тутамд үнийн өсөлтийн дарамтад орж байгаа бөгөөд хүнсний сагсны өртөг ийнхүү өсөх нь дундаж болон бага орлоготой өрхүүдийн хэрэглээг эрс танахад хүргэж байна. Төрийн зүгээс инфляцыг тогтворжуулах бодит алхмуудыг авч хэрэгжүүлэх зайлшгүй шаардлага тулгараад байгааг эдгээр тоо баримтууд сануулсаар байна.