Цахим орчинд арилжааны банкнуудын лого, таних тэмдгийг ашиглан иргэдийг төөрөгдүүлэх замаар мөнгө залилах үйлдэл гаарч байна. Сүүлийн үеийн мэдээллээр, энэ төрлийн гэмт хэргийн улмаас нэгэн иргэн их хэмжээний мөнгөн хохирол амсжээ.
Тодруулбал, энэ оны тавдугаар сарын 10-ны өдөр Сүхбаатар дүүргийн цагдаагийн хэлтэст нэгэн хохирогчоос гомдол ирсэн байна. Тэрээр “Хаан банкны 35 жилийн ойн судалгаа” гэх хуурамч линкээр нэвтэрч, асуулга бөглөснөөр дансандаа байсан 9 сая гаруй төгрөгөө нэгхэн мөчийн дотор алдсан байна.
Залилагчид зөвхөн Хаан банк бус, “Голомт банк харилцагчдынхаа саналыг сонсохыг хүсэж байна” гэх мэтээр бусад банкуудын нэрийг ч ашиглаж байгааг анхаарах хэрэгтэй. Тэд 800,000 хүртэлх төгрөгийн урамшуулал амлах бөгөөд “10,000+ хүн аль хэдийн оролцсон” гэх мэтээр иргэдийн итгэлийг олохыг оролддог байна.
Иргэд та бүхэн дараах аюулгүй байдлын зөвлөмжийг дагаж, сонор сэрэмжтэй байхыг цагдаагийн байгууллагаас анхаарууллаа:
- Сэжигтэй холбоос буюу линк дээр хэзээ ч бүү дар.
- Банкны нэвтрэх нэр, нууц үгийг баталгаагүй цахим хуудсанд хэзээ ч бүү бич.
- Аливаа урамшуулал, судалгааны мэдээллийг банкны албан ёсны вэбсайт болон аппликейшнээр дамжуулан заавал нягталж хэвшээрэй.
Хэрэв та энэ төрлийн залилангийн хохирогч болсон бол 102 эсвэл 5126-5666 дугаарт хандаж яаралтай мэдээлэл өгөх шаардлагатай. Сэжигтэй мэдээллийг бусдад түгээхгүй байх нь та өөрийгөө болон ойр дотны хүмүүсээ эрсдэлээс хамгаалж буй хэрэг юм.
