Нийслэл хотын төв талбайд монгол түмний өв соёл, үндэсний бахархлыг илтгэсэн “Дээлтэй монгол” наадам маргааш /2026.07.09/ зохион байгуулагдах гэж байна. Уг арга хэмжээ нь Тулгар төрийн 2235 жил, Их Монгол Улсын 820 жил, Үндэсний эрх чөлөө, Тусгаар тогтнолоо сэргээн мандуулсны 115 жил, Ардын хувьсгалын 105 жилийн ойн Үндэсний Их Баяр Наадмын хүрээнд “Үндэсний хувцасны өдөр”-ийг тохиолдуулан Д.Сүхбаатарын талбайд болох юм.
Баярын хөтөлбөрийн хувьд туйлын баялаг бөгөөд морин хуурын тоглолт, монгол бүжгийн үзүүлбэр зэрэг сонирхолтой арга хэмжээнүүдийг төлөвлөжээ. Түүнчлэн наадмын үеэр Монголын урлагийн сор болсон дараах уран бүтээлчид хуран цугласан олонд зориулж ая дуугаа өргөх юм.
- Харанга хамтлагийн дуучин Х.Лхагвасүрэн
- Чингис хаан хамтлагийн ахлагч Д.Жаргалсайхан
- МУСТА Т.Дэлгэрмөрөн, А.Мөнхбат
- МУГЖ Д.Бурмаа, Л.Банзрагч Үзэгчид эдгээр уран бүтээлчдийн шилдэг бүтээлүүдийг Төв талбайгаас шууд сонсох боломжтой. Энэхүү тоглолтууд нь наадмын уур амьсгалыг улам бүр хөглөх нь дамжиггүй.
Үүнээс гадна энэ удаагийн соёлын арга хэмжээ олон улсын онцгой үйл явдлаар өргөжихөөр байна. Тухайлбал, Монгол Улсад айлчлан ирэх БНСУ-ын ерөнхийлөгч И Жэ Мюныг наадамд оролцож буй үндэсний дээл, хувцастай иргэд угтан авах юм байна. Төрийн өндөр хэмжээний зочныг ийнхүү уламжлалт хувцастайгаа угтах нь манай улсын ёс заншлыг сурталчлах томоохон боломж болно.
