Нийслэлийн авто замын түгжрэлийг сааруулах цогц төлөвлөгөөний дагуу хотын дөрвөн гол цэгт нүхэн гарц барих ажил үргэлжилж байна. Эдгээрийн нэг болох Таван шарын нүхэн гарцын авто замын хөдөлгөөнийг 2024 оны есдүгээр сард нээж, орчны тохижилт, ногоон байгууламжийн ажлуудыг нь гүйцэтгэж дуусгасан билээ. Одоо тус бүсэд явган зорчигчдын хөдөлгөөнийг аюулгүй болгох зорилгоор 90 метр урттай гүүрэн гарц барихаар бэлтгэл ажлыг хангаж эхлээд байна.
Энэхүү байгууламж нь иргэдийг авто болон төмөр замын хөдөлгөөний эрсдэлээс бүрэн хамгаалахад чиглэгдсэн бөгөөд ирэх зун ашиглалтад оруулахаар төлөвлөжээ. Гүүрэн гарц нь хүн бүрт хүртээмжтэй байх үүднээс дараах онцлог шийдлүүдийг агуулсан байна:
- Хүртээмжтэй байдал: Гурван өөр байрлалаас орох, гарах боломжтой рамп болон пандусыг суурилуулна.
- Тэгш зорчих нөхцөл: Огцом налуугүй хийцлэлтэй байх тул ахмад настан, хөгжлийн бэрхшээлтэй иргэд болон хүүхдийн тэрэгтэй хүмүүст маш тав тухтай байна.
- Дугуйн зам: Дугуйтай иргэд ч мөн аюулгүйгээр гүүрээр зорчих боломж бүрдэнэ.
Таван шарын нүхэн гарц нь 169 метр урт, хос туннел бүхий инженерийн нарийн шийдэлтэй байгууламж гэдгээрээ Улаанбаатар хотын дэд бүтцийн салбарт анхдагч бүтээн байгуулалт болсон юм. Тус байгууламж нь төмөр замын доогуур 5.8 метр өндөр, 10.2 метр өргөнтэйгөөр баригдсан бөгөөд ус зайлуулах иж бүрэн системтэйгээрээ онцлогтой. Шинээр баригдах гүүрэн гарц нь энэхүү нүхэн гарцтай хоршсоноор тус орчмын зорчих хөдөлгөөний аюулгүй байдлыг бүрэн хангах болно.
