Монголын жүдо бөхийн холбоо (МЖБХ) Олон улсын жүдо бөхийн холбоо (IJF)-той хамтран Улаанбаатар хотноо “Их дуулга” (Grand Slam) тэмцээнийг дахин дөрвөн удаа зохион байгуулах эрхээ албан ёсоор баталгаажууллаа. Парис хотноо болж буй 2026 оны “Их дуулга” тэмцээний үеэр IJF-ийн ерөнхийлөгч Мариус Визер болон МЖБХ-ны ерөнхийлөгч Х.Баттулга нар хамтын ажиллагааны гэрээнд гарын үсэг зурсан байна.
Энэхүү гэрээний хамгийн онцлох хэсэг нь Улаанбаатарт болох ээлжит “Их дуулга” тэмцээн “Лос-Анжелес-2028” олимпын наадмын эрх олгох албан ёсны онооны циклийг эхлүүлэх тэмцээн болж байгаа явдал юм. Энэ нь дэлхийн шилдэг тамирчид олимпын оноогоо цуглуулахын тулд Монголыг зорих өндөр ач холбогдолтой үйл явдал болж байна.
Гэрээний гол үр дүнгүүд:
- Тогтвортой байдал: Улаанбаатар хот дахин 4 жилийн турш жүдо бөхийн дэлхийн цувралын нэг зогсоол байна.
- Итгэлцэл: Монгол Улс өмнөх тэмцээнүүдийг өндөр түвшинд зохион байгуулж чадсанаа нотолж, IJF-ийн итгэлийг хүлээлээ.
- Боломж: Залуу тамирчид дэлхийн шилдгүүдтэй эх орондоо өрсөлдөх, туршлага суух алтан боломж үргэлжилсээр байна.
Монгол Улс ба Дэлхийн жүдо
Монголын жүдочид тив, дэлхий, олимпын дэвжээнд тогтмол амжилт гаргаж, жүдо бөхийн “аваргуудын орон” гэдгээ баталсаар ирсэн. Энэхүү тэмцээн нь зөвхөн спорт төдийгүй Монгол орныг дэлхийд сурталчлах, аялал жуулчлалыг хөгжүүлэх, жүдогийн үнэт зүйлс болох хүндлэл, нөхөрлөлийг түгээн дэлгэрүүлэхэд чухал үүрэг гүйцэтгэх юм.
“Монгол Улс дэлхийг угтсаар байх болно. Дэлхий нийт Монголыг жүдо бөхийн спортоор дамжуулан шинээр нээх болно.”
