Конго улсын зүүн бүсэд эбола вирусийн халдварын дэгдэлт үргэлжилж буй энэ үед өвчтөнүүдийг эмчилж байсан нүүдлийн эмнэлэг халдлагад өртжээ. Бухимдсан иргэд эмнэлгийг галдан шатаасан бөгөөд зөрчил вирусийн халдвараар нас барсан өвчтөний шарилыг эмч нар ар гэрийнхэнд нь өгөхөөс татгалзсанаас үүдсэн байна.
Орон нутгийн улс төрч Люк Малембе Малембе болсон явдлыг харсан тухайгаа хэвлэлд ярихдаа “Тэд эмнэлэг рүү шатаагч бөмбөг шидэж эхэлсэн. Энэ үеэр хүмүүсийг тусгаарлахад ашиглаж байсан майхан хүртэл шатсан” гэжээ. Эмх замбараагүй байдлыг намжаахаар цагдаа нар ирж, анхааруулах зорилгоор агаарт хий буудсан байна.
Эбола вирусийн халдвараар нас барсан хүний цогцсыг эрх баригчид халдвар хамгааллын дэглэмийн дагуу аюулгүй оршуулах үүрэгтэй байдаг. Гэвч энэ тохиолдолд ар гэрийнхэн болон нутгийн иргэд нас барсан хүнийг уламжлалт ёсоор хүндэтгэн оршуулах хүсэлтэй байсан нь маргааныг хурцатгажээ.
Халдлага Итури мужийн Буниа хотын ойролцоо байрлаж байсан эмнэлэгт болсон байна. Энэ удаагийн дэгдэлтийн бараг бүх тохиолдол тус бүсэд бүртгэгдсэн бөгөөд эмнэлгийн ажилтнуудын аюулгүй байдлыг хангахаар нэмэлт цэрэг байрлуулжээ.
Цагдаа нарыг ирэхээс өмнө эмнэлгийн нэг ажилтан иргэдийн шидсэн чулуунд оногдож гэмтсэн байна. Харин халдлагын үеэр эмчлүүлж байсан зургаан өвчтөн эмнэлгээс зугтжээ.
Нас барсан өвчтөн нь орон нутгийн хөлбөмбөгийн багт тоглодог, олны танил нэгэн байсан гэнэ. Тиймээс түүний ар гэрийнхэн болон нутгийн иргэд цогцсыг зохих ёсоор хүндэтгэн оршуулах шаардлага тавьсан байна.
Итури мужид вирусийн тархалтыг зогсоох арга хэмжээг хариуцаж буй Жан Клод Мукендигийн хэлснээр, нутгийн иргэд эбола вирусийн талаар хангалттай мэдээлэлгүй байгаа нь ийм зөрчил гарахад нөлөөлжээ. Өвчтөний ээж ч хүүгээ эбола вирусийн халдвараар бус, хижиг өвчнөөр нас барсан гэж үзэж байгаагаа хэвлэлд ярьсан байна.
Люк Малембе Малембе нөхцөл байдлыг тайлбарлахдаа “Хүмүүс юу болж байгаа талаар зохих ёсны мэдлэггүй байна. Хүн амын тодорхой нэг хэсэг, ялангуяа алслагдсан бүс нутгийн иргэд Эболаг гаднын хүмүүсийн зохион бүтээсэн зүйл гэх ойлголт түгээмэл байна. Тэд үүнийг мөнгө олохын тулд төрийн бус байгууллагууд, эмнэлгүүдийн бий болгосон зохиомол зүйл гэж үзэж байгаа нь эмгэнэлтэй юм” гэжээ.
Халдлага Конго улсын хөлбөмбөгийн үндэсний шигшээ баг вирусийн тархалтын улмаас ирэх сард эхлэх дэлхийн аварга шалгаруулах тэмцээний бэлтгэлээ нийслэл Киншаса хотод хийхээр төлөвлөж байснаа цуцалсны дараа гарсан байна. Лхагва гарагийн байдлаар эбола вирусийн халдвараар 139 хүн нас барж, 600 гаруй хүнээс халдварын шинж тэмдэг илэрчээ.
Сэжигтэй хоёр тохиолдол Конгын хөрш Уганда улсад бүртгэгдсэн байна. Энэ удаагийн дэгдэлтээр Эбола вирусийн ховор хувилбар Бундибугио тархаж байгаа бөгөөд уг хувилбарын эсрэг вакцин одоогоор байхгүй юм.
Дэлхийн Эрүүл Мэндийн Байгууллагын мэдээлснээр Бундибугио хувилбарын эсрэг вакцин бүтээхэд зургаагаас есөн сарын хугацаа шаардлагатай аж. Халдвар тархсан бүс нутгийн зарим хэсэг M23 нэртэй босогчдын зэвсэгт бүлгийн хяналтад байгаа нь өвчний хяналт, эмчилгээний ажлыг улам хүндрүүлж байна.
Өчигдөр M23 бүлэг Өмнөд Киву мужид эбола вирусийн халдварын анхны тохиолдол бүртгэгдсэн талаар мэдээлжээ. Тус муж нь дэгдэлтийн голомтоос хэдэн зуун километрийн зайд оршдог бөгөөд Кисангани хотоос ирсэн 28 настай залуу вирусийн халдвар батлагдахаас өмнө нас барсан гэж мэдэгдэлдээ дурдсан байна.
Конгын хойд бүсийн томоохон хот Кисанганид одоогоор эболагийн тохиолдол бүртгэгдээгүй байна. Гэсэн ч халдварын тархалт, иргэдийн үл итгэлцэл, зэвсэгт бүлгийн хяналт зэрэг хүчин зүйлс нөхцөл байдлыг улам эрсдэлтэй болгож байна.
