АНУ-ын их дээд сургуулиуд оюутнууд хиймэл оюун ухааныг (AI) өргөнөөр ашиглах болсонтой холбогдуулан мэдлэгийг нь үнэлэхдээ аман шалгалтыг илүүд үзэх болжээ. Энэ тухай Associated Press агентлаг мэдээллээ.
Багш нарын ажигласнаар, оюутнуудын гэртээ бичсэн эссэ, даалгаврууд “хэтэрхий төгс” болоод байгаа ч түүнийгээ тайлбарлахдаа оюутнууд ихээхэн хүндрэлтэй тулгарч байна. Энэ нь залуусын шүүмжлэлт сэтгэлгээ болон бие даан дүн шинжилгээ хийх чадварт эргэлзээ төрүүлэх болжээ.
Үүний хариуд хэд хэдэн сургууль оюутан хийсэн ажлаа багшийн өмнө биечлэн хамгаалдаг аман шалгалтын хэлбэрт эргэн орж байна:
- Корнеллийн их сургууль: Профессор Крис Шаффер “Та аман шалгалтыг хиймэл оюун ухааны тусламжтайгаар ‘давж’ чадахгүй” хэмээн онцолсон байна.
- Пенсильванийн их сургууль: Аман шалгалтыг бичгийн даалгаврын нэмэлт болгон ашиглаж эхэлжээ. Энэ нь зөвхөн хуулалттай тэмцэх бус, харин шүүмжлэлт сэтгэлгээ, бүтээлч байдал зэрэг алдагдсан ур чадваруудыг эргүүлэн сэргээх зорилготой аж.
- Нью-Йоркийн их сургууль: Багш нар аман шалгалтын шалгуурыг чангатгаж, хичээл дээр илтгэл тавих, ганцаарчилсан асуулт асуух зэргийг түлхүү ашиглах болсон байна.
Зарим сургууль бүр сонирхолтой арга хэрэглэж байгаа бөгөөд оюутнаас асуулт асуудаг тусгай чат-бот ашиглан аман шалгалт авч эхэлжээ.
Аман шалгалтыг сонирхох хандлага цар тахлын дараа, ялангуяа 2022 онд ChatGPT гарч ирсний дараа эрс нэмэгджээ. Одоо их сургуулиуд алгоритмын гаргасан үр дүнг бус, оюутны бодит мэдлэгийг үнэлэх арга замыг идэвхтэй хайж байна. Багш нарын үзэж байгаагаар, аман шалгалт нь тухайн сэдвийг хэр гүнзгий ойлгосныг илрүүлэхээс гадна технологийг сохроор дагалгүй, сэдэвтээ үнэхээр анхаарал хандуулах сэдэл болдог байна.
