“Пианино”, “Юрийн галавын цэцэрлэг” (Jurassic Park) зэрэг кинонуудаараа алдаршсан Шинэ Зеландын жүжигчин Сэм Нилл 78 насандаа таалал төгсжээ.
Түүний гэр бүлийнхний мэдээлснээр, жүжигчин 7-р сарын 13-ны өдөр Сидней хотод ойр дотны хүмүүсийнхээ дэргэд амьсгал хураажээ. Үхлийн шалтгаан одоогоор тодорхойгүй байна. Өмнө нь Нилл цусны хорт хавдрын эмчилгээ хийлгэж байсан бөгөөд сүүлийн үед өвчин нь намжмал (ремисси) байдалтай байсан юм.
Гэр бүлийнхэн нь “Бидний хувьд нөхөж баршгүй, гэнэтийн гарз тохиолоо” хэмээн мэдэгдсэн байна. Мөн Сент-Винсентийн хувийн эмнэлгийн ажилчдад эмнэлгийн тусламж үйлчилгээ үзүүлсэнд талархал илэрхийлжээ.
Карьерын замнал ба түүхэн амжилтууд
Сэм Нилл (жинхэнэ нэр нь Найджел Джон Дермот Нилл) 1947 онд Хойд Ирландад төрсөн бөгөөд бага насандаа Шинэ Зеланд руу нүүжээ. Тэрээр Кентерберийн их сургуулийг төгсөж, Веллингтон дахь “Downstage” театрт ажилласны дараагаар жүжигчний карьераа эхлүүлсэн байна.
Тэрээр карьерынхаа туршид олон арван кино, цувралд тоглож, “Пианино” болон “Юрийн галавын цэцэрлэг” төслүүдээр олон улсад алдаршсан юм.
Түүний карьер дахь эргэлтийн цэг нь АНУ-д гарсан Шинэ Зеландын анхны кино болох “Sleeping Dogs” (1977) байв. Үүний дараа тэрээр “My Brilliant Career” (1979), “Omen III” (1981), Анджей Жулавскийн “Possession” (1981), “Evil Angels” (1988), “The Hunt for Red October” (1990) зэрэг хэд хэдэн томоохон бүтээлд тогложээ. Түүнд олон улсын нэр хүндийг 1993 онд Жейн Кэмпионы “Пианино” болон Стивен Спилбергийн “Юрийн галавын цэцэрлэг” кинонууд авчирсан бөгөөд тэрээр палеонтологич Алан Грантын дүрийг бүтээсэн билээ.
Сүүлийн жилүүдийн үйл ажиллагаа
Нилл 50 гаруй жилийн карьертаа “Dead Calm”, “Event Horizon”, “Bicentennial Man”, “Peter Rabbit” зэрэг кинонууд болон “Peaky Blinders”, “The Tudors” зэрэг цувралуудыг багтаасан 150 гаруй төсөлд дүр бүтээжээ. Тэрээр мөн Жеймс Бондын дүрд нэр дэвшиж, 1986 онд кино сорилтод орж байсан удаатай. Сүүлийн жилүүдэд жүжигчин кино, телевизийн салбарт үргэлжлүүлэн ажиллахаас гадна Шинэ Зеландын Төв Отаго бүс нутагт дарсны бизнес эрхэлж байжээ.
