Монгол Улсын Ерөнхий сайд Н.Учрал болон Засгийн газрын гишүүд, нийслэлийн Засаг дарга бөгөөд Улаанбаатар хотын Захирагч Б.Пүрэвдагва тэргүүтэй албаны төлөөлөгчид Багануур дүүрэгт ажиллалаа. Тэд тус дүүргийн үйлдвэрлэл, технологийн паркийн суурин дээр баригдах Нүүрс пиролизын үйлдвэрийн төслийн явцтай газар дээр нь танилцсан юм. Уг төслийн туршилтын шатанд Багануурын уурхайн 360 тонн нүүрсний дээжийг хагас үйлдвэрлэлийн аргаар боловсруулж, нийслэлийн хэрэглээний стандарт шаардлагад бүрэн нийцсэн өндөр чанартай хагас коксон түлш гарган авах боломжтойг мэргэжилтнүүд баталгаажуулаад байна.
Төслийн эдийн засаг, экологийн үр өгөөж
Нийтдээ 134 сая ам.долларын санхүүжилтээр босох энэхүү аварга бүтээн байгуулалт нь жил бүр 1.8 сая тонн хүрэн нүүрсийг гүн боловсруулах хүчин чадалтай байх юм. Үйлдвэрлэл жигдэрснээр Улаанбаатар хотын өвлийн түлшний хэрэгцээг дотоодоосоо бүрэн хангаж, гаднаас авдаг импортын хагас коксыг бүрэн орлохоор тооцоолжээ. Энэ нь агаарын бохирдлыг 50-60 хувиар бууруулаад зогсохгүй, сайжруулсан түлшний татаасанд жил болгон зарцуулдаг улсын төсвийн хөрөнгийг 200 гаруй тэрбум төгрөгөөр хэмнэх асар их ач холбогдолтой юм. Түүнчлэн тус цогцолборт 420 гаруй иргэн тогтвортой ажлын байраар хангагдах сайн талтай.
Тус үйлдвэр ашиглалтад орсноор жил бүр дараах бүтээгдэхүүн, энергийг зах зээлд нийлүүлнэ:
- 600 мянган тонн өндөр чанарын хагас коксон түлш
- 82-84 мянган тонн нүүрсний давирхай
- 40 МВт цахилгаан эрчим хүч (үүний 26 МВт-ыг төвийн эрчим хүчний системд өгнө)
Бүтээн байгуулалтын хугацаа ба стратегийн ач холбогдол
“Нүүрс-химийн цогцолбор”-ын эхний томоохон алхам болох уг төслийн ерөнхий гүйцэтгэгчийг олон улсын нээлттэй сонгон шалгаруулалтаар тодруулахаар журамлажээ. Нарийн төлөвлөгөөний дагуу барилга угсралтын ажлыг 2028 оны 1 дүгээр улиралд багтаан бүрэн дуусгахаар зорилт тавин ажиллаж байна. Ингэснээр тухайн оныхоо 2 дугаар улирал гэхэд анхны бүтээгдэхүүнүүдийг зах зээлд нийлүүлж эхлэх бөгөөд энэ нь Улаанбаатар хотын экологийн аюулгүй байдлыг хангах стратегийн чухал алхам болох юм.
