Цахим спортын “Counter-Strike 2” төрлийн хамгийн нэр хүндтэй тэмцээн болох “IEM Cologne Major 2026” зургаадугаар сарын 2-ны өдөр хөшгөө нээх гэж байна. Яг 10 жилийн дараа дэлхийн хамгийн том тэмцээн Кёльн хотноо эргэн ирж буй бөгөөд дэлхийн шилдэг 32 баг аваргын цом болон 1,25 сая ам.долларын шагналын сангийн төлөө ширүүн өрсөлдөхөөр зэхэж байна. Энэхүү түүхэн тэмцээний сургаар олон улсын CS2-ын хэвлэл мэдээллийн хэрэгслүүдээр Монголын “The MongolZ” багийн бүрэлдэхүүнтэй холбоотой нэгэн сонирхолтой таамаг эрчээ авлаа.
Шуугиан дэгдэх гол шалтгаан нь “The MongolZ” баг өөрсдийн цахим хуудаснаа нэгэн зураг нийтэлж, “Get ready, a new GOAT is about to take the spotlight” хэмээн нууцлаг тайлбар бичсэнтэй шууд холбоотой. Эл постыг харсан олон улсын шинжээчид болон хөгжөөн дэмжигчид Монголын багийг бүрэлдэхүүнээ шинэчилж, шинэ тоглогч эсвэл дасгалжуулагч авч магадгүй хэмээн хардаж эхэлжээ.
Үүнтэй зэрэгцэн цахим ертөнцөд өрнөсөн дараагийн үйл явдал нь уг таамгийг улам баталгаажуулж, хоёр багийг хооронд нь холбох шалтгаан болсон юм. Тодруулбал, цахим хуудаснуудад дараах сонирхолтой хөдөлгөөнүүд ажиглагдсан байна.
- “BC.Game” багийн мэргэн буудагч Александр “s1mple” Костылев эможитой зэрэгцүүлэн, “Удахгүй” гэж бичсэн нь олон улсын анхаарлыг татав.
- Тус багийн удирдагч Али “akofocus” Муханнед өөрийн хуудсанд “Senzu, сүүлийн мөчид бидэнд тусалсанд баярлалаа. Өмнө нь хэлэхээ мартчихаж” хэмээн нийтэлжээ.
Дээрх мэдэгдлүүдээс харахад Монголын тамирчин Senzu-гийн “BC.Game” баг дахь зээлийн хугацаа албан ёсоор дуусгавар болсон нь тодорхой боллоо. Тэрбээр өнгөрсөн дөрөвдүгээр сард тус багтай 3 тэмцээнд оролцох гэрээ байгуулан тоглож байсан бөгөөд одоо ийнхүү үндсэн багтаа эргэн ирж буй эсвэл шинэ шилжилт хөдөлгөөн хийгдэх гэж буй эсэх нь “IEM Cologne Major 2026”-ын өмнө тодорхой болох хүлээлт үүсгээд байна.
The MongolZ багийн ивээн тэтгэгчээр 1xBet ажиллаж байгаа бөгөөд багийн олон улсын тэмцээн дэх оролцоо, тасралтгүй хөгжлийг дэмжиж байна.
