Нью-Йоркийн захиргаанаас тусгай зөвшөөрөл авсан байна
Америкийн дуучин Тейлор Свифт Трэвис Келситэй хийх хуримаа “Madison Square Garden” аренд зохион байгуулахын тулд Нью-Йорк хотын захиргаанд 160 мянга гаруй ам.доллар төлсөн талаар Variety мэдээлжээ.
Энэ тухай Нью-Йорк хотын дарга Зохран Мамданигийн хэвлэлийн бага хурлын үеэр тодорхой болсон байна. Дуучинд олгосон зөвшөөрөлд хуримын үеэр зарим гудамжийг хаах, нэмэлт цагдаагийн хүч гаргах, арга хэмжээ болох бүсийн эргэн тойронд хамгаалалтын хашаа байрлуулах зэрэг зохион байгуулалтын зардлууд багтжээ.
Мөн төлсөн дүн нь цагдаагийн алба хаагчдын илүү цагийн ажлын хөлсийг хамарсан байна. Сэтгүүлчид Тейлор Свифт цагдаа нарын илүү цагийг төлөх эсэхийг асуухад Мамдани “Тейлор Свифт арга хэмжээний зөвшөөрлийн төлбөр болох 160 мянга гаруй долларыг төлнө, мөн аль хэдийн төлсөн” гэж хариулжээ.
Хурим нууцлал өндөртэй болжээ
Хотын даргын хэлснээр, уг зөвшөөрлийг хурим болохоос хэдхэн хоногийн өмнө олгосон байна. Тейлор Свифт, Трэвис Келси нарын хурим 7-р сарын 2-3-нд хаалттай “Madison Square Garden” аренд маш өндөр нууцлалын дор болсон гэж мэдээлжээ.
Эхний өдөр 100 зочинд зориулсан үдийн зоог зохион байгуулсан бол хоёр дахь өдөр ойролцоогоор 1 000 урилга бүхий зочин хүрэлцэн ирсэн байна. Тэдний дунд урлаг, спорт, энтертайнментын алдартнууд багтжээ.
Хэвлэлүүдийн тооцоогоор, хуримын нийт зардал 30-50 сая ам.долларын хооронд хүрсэн байж магадгүй байна.
