БНХАУ-ын Тусгай захиргааны бүс Хонконгийн Эрүүл мэндийн газар тамхинаас гарах хүсэлтэй хүмүүст зориулан “Chat to Quit” нэртэй чат-ботын туршилтын төслийг хэрэгжүүлж эхэлжээ. Энэхүү программыг Хонконгийн их сургуульд хөгжүүлсэн тухай South China Morning Post сонин мэдээлэв.
Уг чат-ботыг жил бүр уламжлал болгон зохион байгуулдаг “Зургаадугаар сард тамхинаас гарцгаая” аяны хүрээнд танилцуулсан байна. Хөгжүүлэгчдийн зүгээс энэхүү программ хангамж нь “хэрэглэгч бүрийн тамхи татсан түүх, хувийн онцлогт тохирсон зөвлөгөөг тусгайлан хүргэдэг” болохыг онцолжээ.
Тамхинаас гарах аянаа эхлүүлэхийг хүссэн хүмүүс заасан дугаар руу WhatsApp-аар зурвас илгээж, асуумж бөглөхөд л хангалттай. Хэрэглэгчид хиймэл оюун ухаант зөвлөхтэй өдрийн аль ч цагт харилцах боломжтой бөгөөд эхний гурван сарын хугацаанд чат-ботоос сануулах зурвасуудыг тогтмол хүлээн авах аж.
Тус хотын Тамхи, согтууруулах ундааны хяналтын газрын дарга Мэнни Лам хэлэхдээ, хиймэл оюун ухаант хөтөлбөр нь янз бүрийн шалтгаанаар тамхинаас гаргах тусгай клиникүүдэд биеэр очиж чаддаггүй хүмүүст илүү их тус болно гэдгийг тэмдэглэв. Тэрээр “Одоо тэд хоногийн 24 цагийн турш ажиллах хиймэл оюун ухаант чат-ботыг ашиглах боломжтой боллоо” гэж хэлжээ.
Тамхидалтын эсрэг тэмцэл ба статистик
Хонконг улс тамхины хэрэглээний эсрэг тууштай тэмцэж байгаа юм. 2023 онд эрүүл мэндийн байгууллагаас хотын тамхидалтын түвшинг (15 болон түүнээс дээш насны, өдөрт хамгийн багадаа нэг удаа тамхи татдаг хүмүүсийг оруулж тооцсон) 2023 оны 9.1%-иас 2025 оны эцэс гэхэд 7.8% болгон бууруулах зорилтот хөтөлбөрийг боловсруулж байжээ.
Одоогоор энэхүү зорилтод бүрэн хүрч чадаагүй байна. Өнгөрсөн оны 7-оос 10 дугаар сарын хооронд явуулсан судалгаагаар 15 ба түүнээс дээш насныхны дундах тамхидалтын дундаж түвшин 8.5% буюу ойролцоогоор 530 000 хүн байна.
Үүнээс дурдвал:
- Эрчүүдийн тамхидалтын түвшин 2023 онд 16.4% байсан бол 2025 онд 15.2% болж буурсан.
- Эмэгтэйчүүдийнх 2.7%-иос 2.5% болж буурчээ.
- Судалгаанаас үзэхэд Хонконгийн тамхичид 2023 онд өдөрт дунджаар 12.1 ширхэг тамхи татдаг байсан бол 2025 онд энэ тоо 10.9 болж цөөрсөн байна.
